BMT 2026-cı ilə yardımı azaldır
Bazar ertəsi BMT artan humanitar ehtiyaclara baxmayaraq, bu il üçün nəzərdə tutulan yardım büdcəsinin yalnız yarısını ayırmaq xahişi ilə müraciət edib.
NUHÇIXAN xəbər verir ki, BMT-nin özünün etiraf etdiyinə görə, 23 milyard dolların ayrılması ilə bağlı çağırış təcili yardıma ehtiyacı olan on milyonlarla insanı ondan məhrum edəcək, çünki dəstəyin azalması təşkilatı yalnız ən çarəsizlərə üstünlük verməyə məcbur edir.
Maliyyələşdirmənin azaldılması münaqişə zonalarındakı işçilər üçün təhlükəsizlik riskləri və çıxışın olmaması da daxil olmaqla, humanitar təşkilatların üzləşdiyi digər çətinlikləri daha da artırır, - deyə “Reuters” yazır.
“Nəticə etibarilə məhz ixtisarlar bizi bu mürəkkəb və sərt seçimi etməyə məcbur edir”, - deyə BMT-nin humanitar proqramının rəhbəri Tom Fletçer jurnalistlərə bildirib.
“Biz həddindən artıq yüklənmişik, kifayət qədər maliyyələşdirilməmişik və hücumlara məruz qalırıq. Biz təcili yardım maşınını yanğın yerinə aparırıq. Sizin adınızdan. Amma indi bizdən yanğını söndürməyi də xahiş edirlər. Çəndə kifayət qədər su yoxdur və bizə atəş açırlar”, - deyə o qeyd edib.
Bir il əvvəl BMT 2025-ci il üçün təxminən 47 milyard dollar xahiş etmişdi. ABŞ-dan, eləcə də Almaniya kimi digər aparıcı Qərb donorlarından yardımların azaldılmasının miqyası ortaya çıxmağa başladığı üçün bu rəqəm daha sonra azaldılmışdı.
Noyabr ayı etibarilə indiyə qədər cəmi 12 milyard dollar alınıb ki, bu da son 10 ildə ən aşağı göstəricidir və ehtiyacların dörddə birindən bir qədər çoxunu əhatə edir.
Gələnilki 23 milyard dollarlıq plan həyatı təhlükədə olan 87 milyon insanı əhatə edir. Lakin hesabatda bildirilir ki, təxminən iki yüz əlli milyon insanın təcili yardıma ehtiyacı var və vəsait imkan verərsə, onlardan 135 milyon nəfərə 33 milyard dollar ayıraraq yardım edilməsi planlaşdırılır.
Ən böyük məbləğ - 4 milyard dollar Fələstin əraziləri üçün nəzərdə tutulub. Bu məbləğin böyük hissəsi 2,3 milyon sakininin demək olar ki, hamısının evsiz və humanitar yardımdan asılı vəziyyətdə qalmasına səbəb olan, iki il davam edən İsrail-HƏMAS münaqişəsi nəticəsində viran qalan Qəzza zolağı üçün nəzərdə tutulub.
İkinci yerdə Sudan, ardınca isə Suriya yer alıb.