“Ford” Avropa bazarı üçün yeni strategiyasını açıqlayıb
“Ford” şirkəti Avropada davamlı və mənfəətli artım hədəfləri strategiyasının yeni mərhələsini açıqlayıb.
NUHÇIXAN xəbər verir ki, yeni yanaşma “Ford Pro”nun kommersiya avtomobilləri və xidmətlərində mövqeyini daha da gücləndirməyi, elektromobillərdən ibarət yeni məhsul çeşidini inkişaf etdirməyi, eləcə də xərc üstünlüklərini təmin etmək üçün istehsal strukturunun optimallaşdırılmasını nəzərdə tutur.
“Ford” Avropada əlçatan “multi-energy” minik avtomobilləri və elektrikləşmə prosesində istifadəçiləri dəstəkləyəcək geniş kommersiya nəqliyyat portfeli ilə yeni məhsul təqdimatına hazırlaşır. Yeni modellərin 2028-ci ildən etibarən satışa çıxarılması planlaşdırılır.
“Ford”un Avropa üçün nəzərdə tutulan strategiyası dəyişən CO₂ emissiya tələblərinə uyğunlaşmaq və elektrikləşmə mərhələsində alıcılara əlçatan, çoxenerjili seçimlər təqdim etmək üzərində qurulub. Hazırda elektromobillərin Avropa bazarındakı payı 16,1 faiz təşkil edir ki, bu göstərici 2025-ci il üçün müəyyən edilmiş 25 faiz hədəfindən geri qalır.
“Ford” elektrikləşməyə keçid üçün üçpilləli təklifini də açıqlayıb:
– Karbon emissiyası üzrə hədəflərin bazarın uyğunlaşma sürətinə əsasən yenilənməsi;
– Alıcı üçün dəstək mexanizmlərinin və şarj infrastrukturunun gücləndirilməsi;
– Kommersiya nəqliyyatına dair tənzimləmələrdə kiçik və orta bizneslərin ehtiyaclarının nəzərə alınması.