Almaniya hökuməti əsas təminat sistemi ilə bağlı yeni qanun layihəsini təqdim edib

Almaniya hökuməti vətəndaşlıq yardımı (Bürgergeld) sistemini ləğv edərək, onu yeni əsas təminat (Grundsicherung) sistemi ilə əvəz etməyi planlaşdırır.

NUHÇIXAN xəbər verir ki, qanun layihəsi federal hökumətin bugünkü iclasında qəbul olunub.

Yeni sistemə əsasən, sosial yardımlar daha ədalətli və hədəfə yönəlik veriləcək, işi bacaran şəxslər sürətlə işə yönləndiriləcəklər. Yardım alanların iş mərkəzləri ilə əməkdaşlıq etməməsi və öhdəlikləri pozması hallarında sanksiyalar sərtləşdiriləcək.

Qanun layihəsində iş mərkəzlərinin rolu gücləndirilir və xüsusilə 30 yaşadək gənclərin iş bazarına inteqrasiyası üçün tədbirlərin görülməsi nəzərdə tutulur. Uşaq baxımı ilə məşğul olan valideynlər artıq ilk yaşdan iş və inteqrasiya proqramlarına cəlb edilə biləcək, sağlamlıq məhdudiyyətləri olan şəxslər isə hədəflənmiş dəstək və preventiv tədbirlərlə təmin olunacaqlar.

Layihədə sərvət və kirayə xərcləri üzrə qaydalar dəyişdirilərək mövcud birillik istisna müddəti ləğv edilir və sosial yardımın təyinatı üçün nəzərə alınmayan vəsaitin məbləği (Schonvermögen) yaşa uyğun olaraq tənzimlənir. Həmçinin işdən yayınan şəxslərə tətbiq edilən sanksiyalar daha təsirli olacaq, kirayə haqqı birbaşa ev sahibinə ödənəcək. Hökumət qanunla dəstək və əməkdaşlıq, həmrəylik və fərdi məsuliyyət arasında balansı qorumağı hədəfləyir. Məqsəd həqiqətən yardıma ehtiyacı olan şəxslərin sosial dəstək almasını təmin etməkdir.