Çinin neft emalı zavodları Venesuela neftini İran nefti ilə əvəz edəcək
Treyderlərin və analitiklərin proqnozlarına əsasən, Çinin neft emalı zavodları Venesuela Prezidentinin devrilməsindən sonra bu ölkədən olan neft tədarükünü əvəz etmək üçün yaxın aylarda İran kimi digər mənbələrin ağır neftindən istifadəyə keçəcək.
NUHÇIXAN xəbər verir ki, prezident Donald Tramp çərşənbə axşamı Karakasla Vaşinqton arasında Venesuela neftinin ABŞ-a ixracı ilə bağlı 2 milyard dollar məbləğində razılaşma əldə olunduğunu bildirib.
Analitiklər hesab edirlər ki, bu cür razılaşma böyük ehtimalla Venesuela neftinin Çinə tədarükünü azaldacaq və neft emalı zavodları üçün ucuz neft mənbəyini məhdudlaşdıracaq. Dünyada xam neftin ən iri idxalçısı olan Çin Rusiya, İran və Venesueladan endirimli qiymətlərlə tədarük edilən neftin əsas alıcılarından biridir.
“Kpler”in məlumatına görə, 2025-ci ildə Çin sutkada 389 min barel Venesuela nefti idxal edib ki, bu da dəniz yolu ilə ümumi idxal həcminin təxminən 4 faizini təşkil edir.
“Reuters”in məlumatına əsasən, sanksiyalar altında olan və dekabr ayında yüklənən azı 12 gəmi yanvarın əvvəlində Venesuela sularını tərk edərək təxminən 12 milyon barel xam neft və yanacaq daşıyıb. Lakin gəmiçilik məlumatları göstərib ki, yanvarın 1-dən etibarən Venesuelanın əsas limanlarında Asiya istiqamətinə yüklərin göndərilməsi dayandırılıb.
Treyderlərdən birinin sözlərinə görə, tədarükün azalması fonunda Venesuela istehsalı olan “Merey” markalı neftin dərhal tədarük edilən partiyaları ICE birjasında “Brent” markalı neftin qiyməti ilə müqayisədə hər barel üçün təxminən 10 dollar endirimlə təklif olunub. Halbuki ötən ay bu endirim 15 dollar idi, baxmayaraq ki, ticarət demək olar ki, dayanıb. Neftin üzən anbarlarda saxlanma müddəti 75 günədək davam edə bilər.
“Kpler”in baş analitiki Süy Müyun sözlərinə görə, Asiyada gəmilərdə saxlanılan Venesuela neftinin ehtiyatları hələ də Çinin təxminən 75 günlük tələbatını ödəməyə kifayət edir və bu da yaxın müddətdə alternativ mənbələr üzrə qiymətlərin artımını məhdudlaşdırır.