Hindistan raketi ardıcıl ikinci dəfə peykləri orbitə çıxara bilməyib
Hindistan Kosmik Tədqiqatlar Təşkilatı (ISRO) PSLV raketinin daha bir buraxılışını həyata keçirib və bu cəhd də uğursuz olub. Uçuş 12 yanvar 2026-cı il tarixində, Bakı vaxtı ilə səhər saat 6:48-də Şriharikota adasındakı “Satiş Dhavan” kosmik mərkəzinin buraxılış meydançasında baş verib.
NUHÇIXAN xarici mediaya istinadla xəbər verir ki, uçuş zamanı raketin üçüncü mərhələsindəki problem peykin nəzərdə tutulan orbitə yerləşdirilməsinə mane olub.
Adı açıqlanmayan Hindistanın “strateji müştərisi” üçün EOS-N1 peykindən əlavə, raket yerli, habelə Braziliya, Nepal, Tailand və Birləşmiş Krallıqdan olan 18 kiçik tədqiqat peykini də daşıyırdı.
Amerikanın “Next Spaceflight” veb-saytına görə, EOS-N1 Hindistanın Müdafiə Tədqiqat və İnkişaf Təşkilatı (DRDO) tərəfindən hazırlanmış “Anvesha” adlı hiperspektral görüntüləmə peykidir.
Uzunluğu 44,4 metr, diametri 2,8 metr və buraxılış çəkisi 260 ton olan dörd mərhələli PSLV-DL buraxılış vasitəsi təxminən 1,3 ton yükü 600 kilometr hündürlükdə günəş-sinxron orbitə yerləşdirməyə qadirdir.
Nəticəsiz buraxılışdan sonra missiya uğursuz elan edilib. ISRO hələlik hadisənin texniki təfərrüatlarını açıqlamayıb. Xüsusi narahatedici məqam odur ki, bu, ardıcıl ikinci PSLV buraxılışının uğursuz olmasıdır. 2025-ci ilin may ayında həyata keçirilən əvvəlki buraxılış da məyusedici olmuşdu.