Əcnəbi işçilərin mütəşəkkil şəkildə işə götürülməsi üzrə eksperiment Rusiyanın 87 bölgəsini əhatə edəcək
Rusiya xarici vətəndaşların və vətəndaşlığı olmayan şəxslərin işə qəbulu üzrə eksperiment keçirməyi planlaşdırır. Eksperiment Moskva və Moskva vilayəti istisna olmaqla, ölkənin 87 bölgəsini əhatə edəcək.
NUHÇIXAN Rusiya mediasına istinadla xəbər verir ki, eksperimentin 1 yanvar 2027-ci il tarixindən 31 dekabr 2029-cu ilə qədər davam etməsi təklif olunur. Rusiya Daxili İşlər Nazirliyi əcnəbi işçilərin mütəşəkkil şəkildə işə götürülməsinin əlaqələndirilməsini həyata keçirəcək.
Dəyişiklik layihəsinə əsasən, işəgötürənlərin və xarici işçilərin xüsusi reyestri yaradılacaq, habelə eksperiment çərçivəsində əcnəbilərin qanuni işə götürülməsi üçün bu reyestrə daxil olmaq məcburi olacaq. Əcnəbi işçilər üçün şəxsiyyət vəsiqələri tətbiq olunacaq və onların ölkədə qalma müddəti vizaları və ya reyestrdə göstərilən müddətlə müəyyən ediləcək.
Sənəddə, həmçinin hökumətin regional əmək bazarlarının ehtiyaclarını nəzərə alaraq əcnəbi işçilərin məqbul faizini müəyyən edəcəyi nəzərdə tutulur. Eksperiment zamanı əcnəbi işçi qüvvəsinin cəlb edilməsinin digər üsulları istisna ediləcək.
Bu arada, RF Dövlət Duması miqrant işçilərin sağlamlığının monitorinqi üçün əlavə tədbirlər hazırlayır. Dövlət Dumasının sədr müavini və miqrasiya siyasəti Komitəsinin sədri İrina Yarovayanın rəhbərlik etdiyi bir qrup deputat yaxın günlərdə palataya üç qanun layihəsi təqdim edəcək. Bu qanun layihələri sanitar-epidemioloji rifahın təmin edilməsini və miqrant işçilər arasında təhlükəli xəstəliklərin olmadığını təsdiqləməyi hədəfləyir.
Dövlət Dumasının yaz sessiyasının ilk plenar iclasında çıxış edən İrina Yarovaya təklif olunan təşəbbüslərə tibbi prosedurlar zamanı vasitəçilərin fəaliyyətinə tamamilə qadağa qoyulmasını və tibbi müayinə nəticələrinin dəqiqliyinə görə məsuliyyətin artırılmasını daxil etdiyini açıqlayıb. O, bu qanun layihələrinin hökumət və müvafiq qurumlar tərəfindən dəstəkləndiyini bildirib.