Avstraliyanın şərq sahillərində köpəkbalıqlarının hücumundan sonra onlarla çimərlik bağlanıb
Çərşənbə axşamı, yanvarın 20-də Avstraliyanın şərq sahili boyunca, o cümlədən Sidneydə dörd köpəkbalığının iki gün ərzində hücumlarından sonra onlarla çimərlik bağlanıb.
NUHÇIXAN xəbər verir ki, Sidneydən təxminən 400 kilometr şimalda yerləşən Port Makkuori ətrafındakı çimərliklər sörf edərkən bir kişinin köpəkbalığı hücumuna məruz qalmasından sonra bağlanıb. Səhiyyə orqanlarının məlumatına görə, o, xəstəxanada müalicə olunur, sağlamlıq vəziyyəti sabitdir.
“Surf Life Saving New South Wales” (NSW) təşkilatının icraçı direktoru Stiven Pirsin sözlərinə görə, əhaliyə bir müddət çimərliklərdən çəkinmək tövsiyə olunur. “Suyun keyfiyyəti o qədər aşağıdır ki, bu, köpəkbalığının fəaliyyəti üçün çox əlverişlidir”, -deyə Pirs bildirib.
Çimərliklərin bağlanması Cənub yarımkürəsində yay mövsümünün ən qızğın vaxtına təsadüf edir, çünki Avstraliyadakı çimərliklər, adətən, yerli sakinlər və turistlərlə dolu olur.
Bazar ertəsi günü, həmçinin köpəkbalığı 10 yaşlı oğlanı sörf lövhəsindən yıxıb, amma o, təsadüf nəticəsində xəsarət almayıb. Bir gün əvvəl isə şəhər çimərliyində köpəkbalığının dişlədiyi başqa bir oğlan ağır vəziyyətdə xəstəxanaya çatdırılıb.
Polis bildirib ki, Sidneyin şimal sahili boyunca yerləşən bələdiyyə ərazisinə daxil olan bölgədəki bütün çimərliklər daha bir sonrakı xəbərdarlığa qədər bağlı qalacaq.
Köpəkbalığı hücumları günlərlə davam edən güclü yağışlardan sonra baş verib. Bu ərazidə limanı və yaxınlıqdakı çimərlikləri su basıb, nəticədə köpəkbalığı üçün ideal şərait yaranıb. “Öküz” adlanan köpəkbalığı növü duzlu sularda geniş yayılıb. Onlar bir çox hallarda insanlara hücum etmir, lakin bulanıq su bu heyvanların görmə qabiliyyətini azaldır və qarşıdakı əşya və ya insanla toqquşma riskini artırır. Bu zaman onlar ya müdafiə, ya da maraq üzündən hücum edirlər. Bu barədə alim və köpəkbalığı davranışı üzrə mütəxəssis Kris Pepin-Neff “Sydney Morning Herald” qəzetindəki məqaləsində yazıb.
O əlavə edib ki, güclü yağışlar çirkab sularının axınını daha da artırır və köpəkbalıqlarının qidalandığı kiçik balıqları cəlb edir.
Mühafizə qruplarının məlumatına görə, Avstraliyada hər il təxminən 20 köpəkbalığı hücumu baş verir ki, bunlardan üçü ölümcül olur. Bu rəqəmlər ölkə çimərliklərində boğulma hallarının sayı ilə müqayisədə çox azdır.