“Politico”: Tramp BMT-nin maliyyə problemini asanlıqla həll edə biləcəyini deyib
ABŞ Prezidenti Donald Tramp “Politico” nəşrinin müxbiri ilə qısa telefon danışığında özünü maliyyə çöküşü təhlükəsi ilə üzləşən Birləşmiş Millətlər Təşkilatının xilaskarı kimi təqdim edib O, həmçinin təşkilatın üzvlərinin üzvlük haqlarını ödəməsini təmin etmək qabiliyyətini tərifləyib. Lakin Tramp ABŞ-ın beynəlxalq quruma borclu olduğu milyardlarla dolları nə zaman ödəyəcəyi barədə məlumat verməyib.
NUHÇIXAN “Politico” nəşrinə istinadla xəbər verir ki, Tramp ABŞ-ın BMT qarşısındakı öhdəliklərini yerinə yetirmədiyi faktından xəbərsiz olduğunu, lakin problemi çox asanlıqla həll edə biləcəyinə və digər ölkələri də borclarını ödəməyə məcbur edəcəyinə əmin olduğunu bildirib. ABŞ Prezidenti əlavə edib: “Əgər onlar Trampın yanına gəlib problemi ona desələr, NATO-nun timsalında olduğu kimi, hamını ödəməyə məcbur edərdim. Mənim həmin ölkələrin liderlərinə zəng etməyim kifayət edərdi, onlar bir neçə dəqiqə ərzində çek göndərəcəkdi”.
Trampın şərhləri “The New York Times” qəzetində BMT-nin yüksəkvəzifəli rəsmilərinin təşkilatın pulu tükənərsə, əməliyyatlarını azaltmağa və ya hətta Nyu-Yorkdakı qərargahını bağlamağa məcbur ola biləcəyi barədə xəbərdarlıq etməsindən sonra verilib.
Bu xəbərdarlığa münasibət bildirən ABŞ Prezidenti deyib: “Düşünmürəm ki, bu, məqsədəuyğundur. BMT Nyu-Yorkdan ayrılmır və ABŞ-dan da ayrılmır, çünki BMT-nin böyük potensialı var”.
BMT Trampın bazar günü verdiyi şərhlərə cavab verməkdən imtina edib.
Ekspertlər bildirirlər ki, Trampın həm birinci, həm də ikinci prezidentlik müddətində ABŞ çoxsaylı çoxtərəfli qurumu tərk edib. O, sonuncu dəfə yanvar ayında ABŞ-ın BMT-nin əhali agentliyi və beynəlxalq iqlim danışıqlarını təsis edən BMT müqaviləsi də daxil olmaqla 66 təşkilat, agentlik və komissiyadan geri çəkilməsini nəzərdə tutan bir sərəncam imzalayıb. Bundan başqa, keçən il Tramp administrasiyası yüz milyonlarla dollarlıq xarici yardımı kəsib və USAID təşkilatını ləğv edib. Bu fonda Trampın Birləşmiş Millətlər Təşkilatını müdafiə etməsi bir çoxlarına qəribə gəlir. O, təşkilatın vədinə əməl etmədiyi fikrində israr etsə də, BMT-ni qlobal səhnədə əvəzolunmaz bir qurum kimi təqdim edib. “Gələcəkdə mənim müdaxilə etmək imkanım olmayacağı təqdirdə BMT müharibələrin qarşısını ala bilər. Onun böyük potensialı var. Möhtəşəmdir”, -deyə Tramp vurğulayıb.