Almaniya kosmosda 100-dən çox peykdən ibarət hərbi bürc yaradacaq
Almaniyanın Kosmik Komandanlığı bildirib ki, Rusiya və Çindən orbitdə artan təhdidlərə qarşı mübarizə aparmaq məqsədi daşıyan 35 milyard avroluq hərbi kosmik xərclər planı çərçivəsində casus peyklərindən və kosmik təyyarələrdən hücum lazerlərinə qədər müxtəlif sahələrə investisiyaların qoyulması planlaşdırılır.
NUHÇIXAN “Reuters” agentliyinə istinadla xəbər verir ki, Almaniya Kosmik Komandanlığının rəhbəri general-mayor Maykl Traut Sinqapur Aviasiya Sərgisindən əvvəl keçirilən brifinqdə ölkəsinin növbəti bir neçə il ərzində “SATCOM Stage 4” kimi tanınan 100-dən çox peykdən ibarət şifrlənmiş hərbi bürc yaradacağını bildirib.
Onun sözlərinə görə, şəbəkə rabitə və raket izləmə üçün aşağı orbitli peyklər yerləşdirən Pentaqon bölməsi olan ABŞ Kosmik İnkişaf Agentliyinin istifadə etdiyi modeli əks etdirəcək.
“Reuters” agentliyinin ötən həftə verdiyi məlumata görə, Almaniyanın peyk istehsalçısı OHB adı açıqlanmayan bir alman hərbi peyk layihəsi üzrə danışıqlar aparır. Potensial razılaşma Avropanın ən böyük üç kosmik şirkətinin – “Airbus”, “Thales” və “Leonardo”nun milyarder İlon Maskın “Starlink”inə alternativ Avropa peyk rabitəsi qurmağa çalışdıqları bir vaxtda əldə edilib.
General-mayor Traut Almaniyanın hərbi kosmik arxitekturasına investisiyasının Rusiyanın 2022-ci ildə Ukraynaya tammiqyaslı müdaxiləsindən bəri daha kəskin mübahisəli kosmik mühiti əks etdirdiyini bildirib.
Komandanlığın rəisi Berlin və onun Avropa müttəfiqlərinin təkcə təhlükəsiz rabitəyə deyil, həm də düşmən kosmik sistemlərinə mane ola və ya onları sıradan çıxara biləcək imkanlara investisiya qoymaqla çəkindirmə mövqeyini gücləndirməli olduqlarını vurğulayıb.