Ukrayna ordusu Rusiyanın kritik hərbi obyektlərinə zərbələr endirib

Ukrayna ordusu Rusiya Federasiyasındakı vacib hərbi obyektlərə bir sıra zərbələr endirib. Xüsusilə, Volqoqrad vilayətinin Kotluban şəhərindəki arsenal və Miçurinskdəki raket zavodu hədəfə alınıb.

NUHÇIXAN bu barədə Ukrayna Silahlı Qüvvələri Baş Qərargahının “Telegram” kanalına istinadla xəbər verir.

Baş Qərargahın məlumatında qeyd edilib: “Fevralın 12-də, gecə saatlarında Ukrayna Müdafiə Qüvvələrinin bölmələri Volqoqrad vilayətinin Kotluban yaxınlığında Rusiya Müdafiə Nazirliyinin Baş raket və artilleriya idarəsinin raketlər, sursat və partlayıcı maddələr üçün kompleks saxlama məntəqəsinə zərbə endirib”.

Bu arsenal Rusiya ordusu üçün ən böyük sursat saxlama yerlərindən biridir. Arsenala zərbələr Ukraynanın “FP-5 Flaminqo” raketləri ilə endirilib. Zərərin miqyası müəyyənləşdirilir.

Bundan əlavə, Rusiyanın Tambov vilayətinin Miçurinsk şəhərində aviasiya və raket sistemləri üçün yüksək texnologiyalı avadanlıqlar istehsal edən zavoda zərbə endirilib. İlkin məlumatlara görə, zavodun ərazisində yanğın baş verib. Zərərin nəticələri və miqyası müəyyənləşdirilir.

Həmçinin Zaporojye vilayətinin Terpenye kəndi yaxınlığında və Rozovka ətrafında düşmənin sursat anbarlarına zərbələr endirilib.

Baş Qərargah vurğulayıb ki, fevralın 11-də Volqoqrad vilayətindəki Volqoqrad Neft Emalı Zavoduna edilən zərbə nəticəsində əsas ilkin neft emalı qurğusu olan ELOU-AVT-1, AVT-3 elementləri və ərazidəki infrastruktur obyektləri zədələnib.