Mərkəzi Asiya ölkələri Astanada Əfqanıstanla qarşılıqlı fəaliyyəti müzakirə ediblər

Qazaxıstan Xarici İşlər Nazirliyində Mərkəzi Asiya ölkələrinin Əfqanıstan üzrə xüsusi nümayəndələrinin Regional Əlaqə Qrupunun növbədənkənar iclası keçirilib.

NUHÇIXAN Qazaxıstan XİN-ə istinadla xəbər verir ki, görüşdə Qazaxıstan, Qırğızıstan, Tacikistan və Özbəkistan nümayəndələri iştirak ediblər.

Qazaxıstan Prezidentinin Əfqanıstan üzrə xüsusi nümayəndəsi Erkin Tukumov Astananın Kabil ilə qarşılıqlı fəaliyyətinin aktual məsələləri üzrə konstruktiv fikir mübadiləsinə və praktiki həllərin nümayiş etdirilməsinə maraq göstərdiyini vurğulayıb.

Tərəflər Əfqanıstanda mövcud vəziyyəti və praktiki qarşılıqlı fəaliyyət məsələlərini, o cümlədən iqtisadi-ticari əməkdaşlığın inkişafını, bu ölkənin ərazisindən keçən tranzit-nəqliyyat dəhlizlərinin genişləndirilməsini, həmçinin regional təhlükəsizlik məsələlərini müzakirə ediblər.

İştirakçılar Əfqanıstanda sabitliyin və davamlı inkişafın təmin edilməsi məqsədilə Mərkəzi Asiya dövlətlərinin səylərinin əlaqələndirilməsinin vacibliyini qeyd ediblər.

Görüşün yekunlarına əsasən, Regional Əlaqə Qrupu çərçivəsində müntəzəm məsləhətləşmələrin davam etdirilməsinə və işgüzar əlaqələrin qorunub saxlanmasına hazırlıq təsdiqlənib.