Almaniya Fransanı kifayət qədər iddialı olmamaqda ittiham edir

Almaniya Fransa ilə müdafiə siyasəti məsələsində tonunu sərtləşdirib. Rəsmi Berlin Parisin hərbi büdcəni artırmaq istiqamətində səylərini “kifayət etməyən” hesab edir və Avropanın suverenliyi ilə bağlı bəyanatların konkret addımlarla dəstəklənməli olduğunu bildirir.

NUHÇIXAN xəbər verir ki, Almaniyanın xarici işlər naziri Yohan Vadeful isə Almaniyanın ictimai radiosu “Deutschlandfunk”a müsahibəsində bildirib ki, Fransa prezidenti Avropa suverenliyi arzusundan haqlı olaraq tez-tez danışır, lakin bu barədə danışan hər kəs öz ölkəsində buna uyğun hərəkət etməlidir. Onun sözlərinə görə, Fransa Respublikasında indiyədək göstərilən səylər bu məqsədə çatmaq üçün yetərli deyil.

Berlin hesab edir ki, Fransa müdafiə qabiliyyətini gücləndirmək üçün büdcədə daha çox manevr imkanı yaratmalıdır. Yohan Vadefulun fikrincə, bunun üçün sosial xərclərin azaldılması və qənaət tədbirlərinin görülməsi vacibdir ki, Avropanın əsas müdafiə qabiliyyəti məqsədinə nail olmaq üçün lazımi maliyyə imkanları yaradılsın.

Digər tərəfdən, Almaniya Fransanın Avropa səviyyəsində müdafiə investisiyalarını maliyyələşdirmək üçün birgə borclanma təklifini də rədd edib. Berlinə görə, NATO ölkələrinin müdafiə xərclərini ÜDM-in 5 faizi səviyyəsinə çatdırmaq vədi “milli xərclər öhdəliyidir”, Avropa səviyyəsində kollektiv borclanma mexanizmi deyil.

Fransanın bu tənqidlərə necə cavab verəcəyi yaxın həftələrdə aydınlaşacaq.