Rumıniyada ərzağın qiymətinin bir çox Avropa İttifaqı ölkələrindən daha yüksək olduğu açıqlanıb

Rumıniyada ərzaq məhsullarının qiymətləri İspaniya, İtaliya, Portuqaliya və Yunanıstanla müqayisədə daha yüksəkdir.

NUHÇIXAN xəbər verir ki, bu barədə Yunanıstanın ELEN statistika qurumunun məlumatlarına istinadla Rumıniya mətbuatı məlumat yayıb.

Araşdırmaya əsasən, gündəlik istehlak səbətinə daxil olan əsas qida məhsulları üzrə müqayisə göstərir ki, bir sıra ərzaq kateqoriyalarında Rumıniyada qiymətlər Cənubi Avropa ölkələrindən yüksək səviyyədədir. Xüsusilə süd məhsulları, ət, tərəvəz və bu kimi digər ərzaq mallarında qiymət fərqi diqqət çəkir.

Məlumata görə, İspaniya və İtaliya kimi iri kənd təsərrüfatı istehsalçıları olan ölkələrdə daxili istehsalın yüksək payı və güclü paylama şəbəkəsi qiymətlərin daha sabit və nisbətən aşağı səviyyədə qalmasına şərait yaradır. Eyni zamanda, Yunanıstan və Portuqaliyada da bəzi əsas məhsullar üzrə qiymət səviyyəsi Rumıniyadan aşağı göstərilib.

Ekspertlər bildirirlər ki, qiymət fərqləri təkcə istehsal xərcləri ilə deyil, logistika, vergi siyasəti, idxal asılılığı və pərakəndə satış sektorundakı struktur xüsusiyyətləri ilə də bağlıdır. Həmçinin alıcılıq qabiliyyəti nəzərə alındıqda qiymətlərin əhali üçün real yükü daha qabarıq şəkildə hiss olunur.

Qeyd edək ki, statistik göstəricilər Rumıniyada ərzaq məhsullarının bir sıra Avropa ölkələri ilə müqayisədə daha baha olduğunu təsdiqləyir və bu məsələ ölkə daxilində iqtisadi və sosial müzakirələrin əsas mövzularından biri olaraq qalır.