Misir-Çin arxeoloji ekspedisiyası firon Apriesin məbədinin izlərini tapıblar

Misir-Çin birgə arxeoloji missiyası Gizadakı Mit Rahinanın şərqində yerləşən Tel Əziz ərazisindəki firon Apries məbədinə dair yeni ipucları tapıb və bu, qədim Memfis şəhəri haqqında əlavə məlumatlar təqdim edir.

NUHÇIXAN  “Əl Əhram” nəşrinə istinadla xəbər verir ki, arxeoloji missiya fironların 26-cı sülaləsinə aid firon l Apries məbədinin bir hissəsi olduğu düşünülən əhəng daşı quruluşu aşkar edib.

Misirin Ali Antik Əşyalar Şurası (SCA), Pekin Universiteti və Şandun Mədəni İrs və Arxeologiya İnstitutunun iştirak etdiyi missiya əvvəlki mövsümlərdə də eyni məbəd kompleksinin hissələrinin aşkar edildiyi ərazidə qazıntılar aparır.

Turizm və antik əşyalar naziri Şərif Fəthi bu kəşfi Mit Rahinadakı arxeoloji tədqiqatlara dəyərli bir əlavə kimi qiymətləndirib və Misirin tarixi cəhətdən ən zəngin yerlərindən birinin tədqiqində rolunu vurğulayıb. O, həmçinin Misir və Çin arxeoloqları arasında artan elmi əməkdaşlığı təqdir edib.

SCA-nın baş katibi Hişam əl-Leytinin sözlərinə görə, tapıntı qədim Memfisin şəhər quruluşu və dini həyatı haqqında mühüm məlumatlar təqdim edir.

İlkin tədqiqatlar göstərir ki, Tel Əzizin cənub hissəsi şəhərin mərkəzi nüvəsinin bir parçası olub və məbəd 26-cı sülalədən Roma dövrünə qədər əsrlər boyu istifadə edilib. Ərazidə aşkarlanan digər kəşflər arasında beş ədəd başsız sfinks heykəli və Ptah tanrısına həsr olunmuş heroqlif mətnləri olan yazılı daş bloklar toplusu, eləcə də firon Apriesin kartuşları var.

Arxeoloji missiyanın Misir tərəfindən rəhbəri Məhəmməd Əbdül Badieyə görə, komanda, həmçinin ərazidə saxsı və şüşə qablar, mis sikkələr də daxil olmaqla daha kiçik artefaktlar aşkar edib.

Çin qrupunun rəhbəri Çjan Hay bildirib ki, ərazinin tarixini bərpa etməyə kömək edə biləcək əlavə memarlıq elementlərini üzə çıxarmaq üçün qazıntılar aprel ayında bərpa olunacaq.