Səudiyyə Ərəbistanı “Məscid-ül Haram”ı yenidən genişləndirir

Səudiyyə Ərəbistanının Məkkə şəhərində “Məscid-ül Haram”ın üçüncü genişləndirilməsi bu ibadət ocağının tarixində ən böyük inkişaf layihələrindən biri olacaq.

NUHÇIXAN “Saudi Gazette” nəşrinə istinadla xəbər verir ki, İki Müqəddəs Məscidin işləri üzrə Baş idarənin məlumatına görə, genişləndirmə təxminən 1,214 milyon kvadratmetr ərazini əhatə edir və ilboyu rahat ab-havanı qorumaq üçün obyektlər 90 min tonluq soyutma tutumu ilə təchiz olunub.

Məscidin ətrafındakı obyektlərə 25 mindən çox xalça, 1 min Zəmzəm suyu paylayıcısı, 11.436 tualet və dəstəmaz otağı, eləcə də bütün mərtəbələrdə aydın səs yayımını təmin etmək üçün 1300 dinamik daxildir.

Genişləndirmədə, həmçinin 458 içməli su fəvvarəsi, 428 eskalator, 28 lift, 80 qapı və 120 xüsusi namaz yeri mövcuddur ki, bu da xüsusilə pik mövsümlərdə yerüstü, birinci, ikinci mərtəbələrdə və dam örtüklərində rahat hərəkəti və mütəşəkkil giriş-çıxışı asanlaşdırır.

Baş idarə bildirib ki, genişləndirmə əməliyyat planlarının mərkəzində qalır, sahə qrupları xidmət və obyektlərin tam hazırlığını təmin etmək üçün gecə-gündüz işləyir.

Əlavə olaraq bildirilir ki, inteqrasiya olunmuş sistem texniki, mühəndislik və insan resurslarını birləşdirərək təhlükəsiz və əlçatan bir mühit təmin edir, ibadət edənlərə rahatlıq və əmin-amanlıq içində namaz qılmağa imkan verir, eyni zamanda infrastruktur, texniki xidmət, təmizlik və rəhbərlik xidmətlərini təkmilləşdirmək üçün davamlı təkmilləşdirmələr aparılır.