Dünyada ən aşağı doğum nisbəti Cənubi Koreyada qeydə alınıb
Cənubi Koreya hökumətinin çərşənbə günü açıqladığı məlumatlara görə, 2025-ci ildə bu ölkədə doğum nisbəti ardıcıl ikinci il artıb. Bu, təxminən on ildir demoqrafik böhranla üzləşən ölkənin dönüş nöqtəsinə doğru irəliləməyə başlaya biləcəyinə dair daha bir əlamətdir.
NUHÇIXAN “Reuters” agentliyinə istinadla xəbər verir ki, Cənubi Koreya Məlumat və Statistika Nazirliyinin ilkin məlumatlarına görə, ölkədə ümumi doğum nisbəti, yəni bir qadının reproduktiv həyatı boyunca dünyaya gətirməsi gözlənilən orta körpə sayı 2025-ci ildə 0,80 təşkil edib ki, bu da 2024-cü ildəki 0,75-dən çoxdur.
Pandemiyadan sonrakı təşviq və hökumət siyasəti sayəsində bu ölkədə yeni doğuşlar 2024-cü ildə dirçəlməyə başlayıb. Səkkiz il ardıcıl davam edən azalma tendensiyası 2023-cü ildə Cənubi Koreyada 0,72 göstərici ilə dünyanın ən aşağı doğum nisbətinin qeydə alınmasına səbəb olub. Bu dövr ev qiymətlərinin sürətlə artması və qadınların iqtisadi həyatda daha yüksək iştirakı ilə yadda qalıb.
2025-ci ildə hər 1000 nəfərə 5,0 yeni doğuş düşürdü ki, bu da 2024-cü ildəki 4,7-dən çoxdur. Bu rəqəm ötən il Çində 5,6, Tayvanda 4,6 və 2024-cü ildə Yaponiyada 5,7 idi. Bu ölkələrdə də azalma trendi davam edir.
Dirçəliş tempi hökumətin 2025-ci ildə 0,75 və 2026-cı ildə 0,80 optimist proqnozundan daha sürətlidir. Bu proqnoza görə, 2031-ci ildə ümumi doğum nisbəti hər qadına 1,0-dan yuxarı qalxacaq. Bir-iki il gecikmə ilə yeni doğulmuş uşaqların sayının aparıcı göstəricisi olan nikahlar 2024-cü ildə rekord 14,8% artımdan sonra 2025-ci ildə cəmi 8,1% artıb.
Cənubi Koreya hökuməti dərin demoqrafik böhranın qarşısını almaq ailə-uşaq siyasəti üzrə yeni strategiya hazırlayır.