Finlandiya yenidən dünyanın ən xoşbəxt ölkəsi elan edilib

Finlandiya artıq doqquzuncu il ard-arda “World Happiness Report” reytinqində birinci yerdə qərarlaşıb və dünyanın ən xoşbəxt ölkəsi olaraq qalır.

NUHÇIXAN xəbər verir ki, BMT-nin dəstəyi ilə hazırlanan hesabatda müxtəlif ölkələrin sakinləri arasında aparılan sorğular əsasında əhalinin subyektiv rifah səviyyəsi qiymətləndirilir.

İslandiya, Danimarka və Kosta-Rika bu reytinqdə müvafiq olaraq ikinci, üçüncü və dördüncü yerləri tutaraq ilk onluğa daxil olub. İsveç keçənilki nəticədən bir qədər aşağı düşsə də, liderlər arasında yerini qoruyaraq beşinci, Norveç isə altıncı yeri tutub.

Diqqətəlayiq dəyişikliklər arasında son illərdə mövqeyini xeyli yaxşılaşdıran Kosta-Rikanın əhəmiyyətli dərəcədə yüksəlişi də var. Bu arada, ABŞ cəmi 23-cü, Əfqanıstan isə sonuncu yerdədir.

Tədqiqat hər il müxtəlif ölkələrdə təxminən min respondent arasında sorğu keçirir, insanların həyat səviyyəsi və rifah ilə bağlı ümumi təsəvvürlərini əks etdirir.