Gürcüstanda keçən il mənfi təbii artım qeydə alınıb

Keçən il Gürcüstanda 44 min 319 nəfər ölüb, bu da 2024-cü illə müqayisədə 0,8 faiz çoxdur.

NUHÇIXAN xəbər verir ki, bu barədə Gürcüstan Milli Statistika Xidmətinin hesabatında məlumat verilir. Milli Statistika Xidmətinin məlumatına görə, ən çox ölüm halı Tbilisidə qeydə alınıb -12 743 nəfər. Ən az ölüm halı isə Raça-Leçxumi və Aşağı Svaneti bölgələrində olub - 585 nəfər.

Xidmətin 2025-ci il məlumatlarına görə, körpə ölümü nisbəti, yəni hər 1000 diri doğuşa düşən 1 yaşa qədər ölüm hallarının sayı hər min nəfərə 7,6, beş yaşa qədər ölüm nisbəti isə hər min nəfərə 9,1 təşkil edib.

Bununla yanaşı 2025-ci ildə Gürcüstanda mənfi təbii artım qeydə alınıb ki, bu da diri doğum və ölüm sayı arasındakı fərq deməkdir. Bu fərq 6452 vahid olaraq müəyyən edilib.

Bundan əlavə, Tbilisi, Acarıstan Muxtar Respublikası və Kvemo Kartli bölgəsi istisna olmaqla, bütün bölgələrdə mənfi təbii artım qeydə alınıb.