Türkiyənin vitse-prezidenti: Yanacağın bahalaşmasının müvəqqəti olacağına ümid edirik

Türkiyə hakimiyyəti ölkədə yanacaq qiymətlərinin artımının müvəqqəti xarakter daşıyacağına və İran ətrafındakı böhran başa çatdıqdan sonra vəziyyətin müəyyən müddətdən sonra normallaşacağına ümid edir.

NUHÇIXAN xəbər verir ki, bunu Türkiyənin vitse-prezidenti Cevdet Yılmaz jurnalistlərə ölkədə dizel yanacağı və benzinin qiymətlərindəki sıçrayışları şərh edərkən bildirib.

Onun sözlərinə görə, yanacaq bazarında vergilərin, aksiz rüsumlarının və əlavə dəyər vergisinin tutulmasının dayandırılması enerji resurslarının qlobal səviyyədə bahalaşmasının Türkiyə iqtisadiyyatına təsirini məhdudlaşdırmağa imkan verib. “Bu, inflyasiya ilə mübarizədə mühüm addım idi. Biz bu istiqamətdə yeni tədbirlər görməyə davam edirik”, – deyə o bildirib və İran ətrafındakı gərginliyin nəticələrini “bütün dünya üçün problem” adlandırıb.

“Əfsuslar olsun ki, enerji daşıyıcılarının qiymətləri milli səviyyədə müəyyən olunmur. Mövcud vəziyyət həm də geosiyasi risklərlə bağlı qlobal tendensiyaları əks etdirir”, – deyə vitse-prezident qeyd edib.

C.Yılmaz bildirib ki, hökumət bazarı qorumaq üçün bütün lazımi qərarları qəbul edir: “Əgər biz qiymətlərin formalaşması üzrə stimullaşdırıcı mexanizmi tətbiq etməsəydik, bu gün Türkiyədə dizel yanacağı və benzinin vəziyyəti tam fərqli olardı. Bununla yanaşı, imkanlarımızdan kənara çıxan məsələlər də var”.

İran ətrafında münaqişə başlanan vaxt Türkiyədə dizel yanacağının bir litri təxminən 60 lirə idi, aprelin 1-dən isə qiymət 80 lirəyə yaxınlaşıb.

Fevralın sonunda İstanbul şəhərində bir litr benzinin qiyməti təxminən 58 lirə təşkil etdiyi halda, hazırda 62,5 lirəni ötür.