Vens İran ilə danışıqların müsbət nəticələr verəcəyinə ümid edir

İran nümayəndə heyəti ilə İslamabadda keçiriləcək danışıqlarda ABŞ nümayəndə heyətinə başçılıq edəcək Birləşmiş Ştatların vitse-prezidenti Cey. Di. Vens müzakirələrin müsbət nəticələr verəcəyinə ümid edir.

NUHÇIXAN xəbər verir ki, Pakistana yola düşməzdən əvvəl Tehrana “bizimlə oynamamaq barədə xəbərdarlıq edirəm” deyən Vens vurğulayıb: “İranla danışıqların müsbət olacağına ümid edirəm. Danışıqları səbirsizliklə gözləyirik. Düşünürəm ki, bu, müsbət olacaq”.

Vens əlavə edib: “Amerika Birləşmiş Ştatları Prezidenti dediyi kimi, əgər iranlılar vicdanla danışıqlar aparmağa hazırdırsa, biz də açıq əlimizi uzatmağa hazırıq. Əgər onlar bizimlə oynamağa çalışacaqlarsa, onda danışıqlar aparan komandanın o qədər də xoş olmayan münasibətini görəcəklər”.