Fransa xarici tələbələr üçün təhsil haqqını artırır

Fransa hakimiyyəti Avropa İttifaqının (Aİ) üzvü olmayan ölkələrdən gələn tələbələr üçün qaydaları sərtləşdirir. Onların əksəriyyəti qarşıdakı illərdə artırılmış təhsil haqqı ödəyəcək.

NUHÇIXAN xəbər verir ki, bu barədə ali təhsil naziri Filip Baptist “Le Parisien” qəzetinə müsahibəsində bildirib.

Onun sözlərinə görə, nəzərdə tutulan dəyişikliklər hökumətin Fransa universitetlərinin cəlbediciliyini artırmağa yönəlmiş "Ali təhsil üçün Fransanı seçin" proqramının bir hissəsidir. Fərqli ödəniş mexanizmi 2019-cu ildə işə salınsa da, onun tətbiqi məhdud olub. Aİ üzvü olmayan ölkələrdən olan tələbələrin təxminən yalnız 10 faizi daha yüksək təhsil haqqı ödəyir.

İndi hakimiyyət orqanları bu vəziyyəti dəyişdirmək niyyətindədir. Plana görə, əksər əcnəbi tələbələr üçün təhsil haqları əhəmiyyətli dərəcədə artacaq. Bakalavr dərəcəsi üçün təhsil haqqı hazırkı 178 avrodan ildə təxminən 2895 avroya, magistr dərəcəsi üçün isə 254 avrodan 3941 avroyadək yüksələcək.

İslahat tədricən həyata keçiriləcək və hazırda təhsil alanlara şamil edilməyəcək. Nazirliyin hesablamalarına görə, artımlar universitetlərə ildə 250 milyon avroya qədər əlavə gəlir gətirə bilər.