Ukraynada liseylərə qarşı terror hücumlarının qarşısı alınıb
Ukrayna Təhlükəsizlik Xidməti (SBU) və Milli Polis Departamenti Kirovoqrad və Odessa vilayətlərindəki liseylərdə Rusiyanın sifarişi ilə həyata keçirilə biləcək bir sıra qanlı terror hücumlarının qarşısını alıb.
NUHÇIXAN xəbər verir ki, bu barədə SBU məlumat verib.
Qeyd olunub ki, proaktiv tədbirlər nəticəsində iki yerli məktəblinin Rusiya Federasiyası tərəfindən liseyləri partlatmaq və sinif yoldaşlarını odlu silahla güllələmək əmri aldığı müəyyən edilib.
İstintaq müəyyən edib ki, Rusiya kəşfiyyat xidmətləri uşaqları qanunsuz fəaliyyətlərə cəlb etmək üçün rusların manipulyativ istifadə etdiyi “Telegram” və “TikTok” qruplarından hər iki yetkinlik yaşına çatmayan şəxsi cəlb edib.
Məlumata görə, düşmən “ədalətli məqsədə çatmaq”, qohumlarını qisasdan qorumaq, məktəbdə onları təhqir etdiklərinə görə “məsul şəxsləri cəzalandırmaq” və sair mövzulardan istifadə edərək gənc insanları öz sıralarına cəlb edirmiş.
Rusiya kəşfiyyat xidmətləri məktəbliləri təkcə terror hücumları törətməyə deyil, həm də cinayətdən dərhal sonra intihar etməyə təşviq edirdi. Bu yolla ruslar “lazımsız şahidləri” aradan qaldırmağa ümid edirdilər.
Kirovoqrad bölgəsində 15 yaşlı lisey şagirdinə rusiyalı nəzarətçi tərəfindən evdə əldəqayırma materiallardan bomba hazırlamaq tapşırığı verildiyi sənədləşdirilib.
O, hazır partlayıcı maddəni təhsil aldığı məktəbə gətirməli və dərslərarası fasilə zamanı partlatmalı idi. Bundan əlavə, düşmənin təlimatlarına əməl edərək, sağ qalanları öldürmək üçün babasının tüfəngini və ov bıçağını özü ilə aparmağı planlaşdırırdı.
SBU əməkdaşları yetkinlik yaşına çatmayan şəxsi əvvəlcədən müəyyən edib və onun Rusiya kəşfiyyat zabiti ilə əlaqələrini sənədləşdiriblər.
Şübhəlinin evində axtarışlar zamanı əldəqayırma partlayıcı qurğu (PPS), onun komponentləri, tüfəng, kompüter və smartfon müsadirə edilib.
Eyni zamanda, Odessa bölgəsində yerli bir tələbənin ruslar tərəfindən əməkdaşlığa cəlb edilməsi ifşa olunub. Rusiya kəşfiyyat xidmətlərinin ona odlu silah və ov bıçağı olan bağlama göndərməyi planlaşdırdığı müəyyən edilib.
İstintaqa görə, gənc oğlan bu silahlardan istifadə edərək oxuduğu liseydə şagirdləri kütləvi şəkildə qətlə yetirməli idi.
SBU müstəntiqləri Kirovoqrad bölgəsindən olan 15 yaşlı şübhəlini Ukrayna Cinayət Məcəlləsinin 14-cü maddəsinin 1-ci hissəsi və 258-ci maddəsinin 1-ci hissəsi (terror aktına hazırlıq) ilə ittiham ediblər. Onu əmlakı müsadirə olunmaqla 10 ilə qədər həbs cəzası gözləyir.
Bütün təqsirkar şəxslərin məsuliyyətə cəlb edilməsi istiqamətində istintaq davam edir.