İl yarımlıq fasilədən sonra ABŞ-dən Çinə birbaşa LNG tədarükü iyun ayında başlaya bilər

Çin il yarımdan çox müddətdən sonra iyun ayında ABŞ-dən ilk birbaşa mayeləşdirilmiş təbii qaz (LNG) tədarükünü qəbul edə bilər ki, bu da iki ölkə arasında ticarət gərginliyinin qismən yumşaldılmasının siqnalı olacaq.

NUHÇIXAN Britaniyanın qlobal şirkəti LSEG-in məlumatlarına istinadla xəbər verir ki, ötən həftə ABŞ-nin Luiziana ştatındakı ixrac terminallarından Çinə gedən üç mayeləşdirilmiş təbii qaz tankeri yola düşüb. Gəmilərin 15-20 iyun tarixləri arasında Tianjin limanına çatacağı gözlənilir.

Çin şirkətləri ilə ABŞ-nin mayeləşdirilmiş təbii qaz istehsalçıları arasında uzunmüddətli müqavilələrə baxmayaraq, son bir ildə yanacağın birbaşa tədarükü faktiki olaraq həyata keçirilməyib. Pekin ilə Vaşinqton arasında davam edən ticarət tarifləri fonunda müqavilə həcmləri digər ölkələrdəki alıcılara yenidən satılıb.

“EBW Analytics” qrupunun məlumatına görə, bu şərtlər altında Çin Rusiya və Mərkəzi Asiya ölkələrindən boru kəməri ilə qaz tədarükündən asılılığını artırıb. Xüsusilə, 2025-ci ildə Çinə təxminən 38,8 milyard kubmetr Rusiya qazı “Sibir gücü” boru kəməri vasitəsilə çatdırılıb.

Kolumbiya Universitetinin Qlobal Enerji Siyasəti Mərkəzinin mütəxəssisləri qeyd edirlər ki, Pekin ABŞ-ni daha az etibarlı ticarət tərəfdaşı kimi görür və alternativ enerji təchizatçılarına üstünlük verir.

Amerikanın LNG tədarükünün birbaşa bərpası ABŞ Prezidenti Donald Tramp və Çinin Sədri Si Cinpin arasında 14-15 may tarixlərində Pekində keçirilməsi planlaşdırılan görüşlə üst-üstə düşür. Amerika lideri bir gün əvvəl artıq Çinə yola düşüb.

Analitiklər hesab edirlər ki, danışıqların nəticəsi dünyanın iki ən böyük iqtisadiyyatı arasında enerji əməkdaşlığının daha da inkişafına təsir göstərə bilər.