Almaniya BMT Təhlükəsizlik Şurasının qeyri-daimi üzvlüyünə seçilə bilməyib

Almaniyanın 2027-2028-ci illər üçün BMT Təhlükəsizlik Şurasının qeyri-daimi üzvü olmaq cəhdi uğursuzluqla nəticələnib.

NUHÇIXAN  xəbər verir ki, BMT Baş Assambleyasında keçirilən gizli səsvermədə Almaniya “Qərbi Avropa və digər dövlətlər” regional qrupunda Portuqaliya və Avstriyaya məğlub olub. Portuqaliya 134, Avstriya 131, Almaniya isə 104 səs toplayıb. BMT Təhlükəsizlik Şurasının qeyri-daimi üzvü seçilmək üçün BMT-yə üzv 193 dövlətin üçdəiki səs çoxluğu tələb olunur.

İndiyədək altı dəfə bu qurumun qeyri-daimi üzvlüyünə seçilən Almaniya sonuncu dəfə 2019-2020-ci illərdə Təhlükəsizlik Şurasında təmsil olunub.

“Tagesschau” xəbər xidmətinin məlumatına əsasən, federal hökumətin Qəzza müharibəsi ilə bağlı mövqeyinin Almaniyanın namizədliyinə dəstəyin azalmasına təsir edən amillərdən olub.

Seçkilərin nəticələri Almaniyada siyasi müzakirələrə səbəb olub. Yaşıllar Partiyası uğursuzluğa görə Kansler Fridrix Mertsi və xarici işlər naziri Yohan Vadefulu tənqid edib. Xristian Demokrat İttifaqı (CDU) isə nəticəni təəssüf doğuran hal kimi qiymətləndirərək, gələcəkdə Avropa ölkələri arasında daha erkən koordinasiyanın vacibliyini vurğulayıb.