Prezidentlər Mirziyoyev və Putin Özbəkistan AES-in 1-ci enerji blokunun tikintisinə start veriblər
Özbəkistan Prezidenti Şavkat Mirziyoyev və Rusiya Prezidenti Vladimir Putin Özbəkistanda inteqrasiya olunmuş atom elektrik stansiyasının ilk enerji blokunun tikintisinə start veriblər.
NUHÇIXAN rəsmi UZA agentliyinə istinadla xəbər verir ki, telekonfrans vasitəsilə keçirilən mərasimdə Atom Enerjisi üzrə Beynəlxalq Agentliyin baş direktoru Rafael Qrossi iştirak edib.
Prezident Mirziyoyev bu layihənin həyata keçirilməsinə göstərdikləri şəxsi dəstəyə və diqqətə görə Vladimir Putinə və Rafael Qrossiyə təşəkkürünü bildirib. O, həmçinin ölkənin ilk atom elektrik stansiyasının tikintisində iştirak edən özbək və rus mütəxəssislərinə birgə işlərinə və yüksək peşəkarlıqlarına görə minnətdarlıq edib.
Qeyd edilib ki, bu layihənin həyata keçirilməsi Özbəkistanın texnoloji, sənaye və elmi inkişafında yeni bir mərhələnin başlanğıcını qoyur və yeni bir sənayenin - nüvə enerjisinin inkişafına təkan verir. Bu layihə kiçikmiqyaslı nüvə istehsalı və irimiqyaslı baza yüklü elektrik enerjisi istehsalındakı ən son nailiyyətləri birləşdirir.
Belə genişmiqyaslı layihənin həyata keçirilməsinin və onun nəticələrinin Özbəkistan-Rusiya hərtərəfli strateji tərəfdaşlıq və müttəfiqlik münasibətlərinin daha da möhkəmləndirilməsinə xidmət edəcəyinə əminlik ifadə edilib.