Fransa 2027-ci il prezident seçkiləri öncəsi xarici müdaxilələrə qarşı tədbirləri açıqlayıb
Fransanın Baş naziri Sebastyan Lökornü 2027-ci il prezident seçkiləri ərəfəsində xarici müdaxilə riskləri və demokratik proseslərin qorunması üçün nəzərdə tutulan tədbirləri siyasi partiya nümayəndələri və media qarşısında təqdim edib.
NUHÇIXAN xəbər verir ki, təşəbbüs əvvəlki seçkilər zamanı qeydə alınmış müdaxilə cəhdlərini təhlil etmək və qarşıdakı prezident və mümkün parlament seçkilərinə təsir göstərə biləcək təhlükələri müəyyənləşdirmək məqsədi daşıyır.
Təqdimatda daxili işlər naziri Loran Nünez, silahlı qüvvələr naziri Ketrin Votren, xarici işlər naziri Jan-Noel Barro, eləcə də kəşfiyyat xidmətləri, Milli Müdafiə və Təhlükəsizlik Baş Katibliyi (SGDSN) və onlayn dezinformasiya ilə mübarizə aparan “Viginum” qurumunun rəhbərləri iştirak ediblər.
Hökumətin əsas narahatlıqları arasında sosial şəbəkələrdə yayılan dezinformasiya kampaniyaları, kibertəsir əməliyyatları və xarici aktorlar tərəfindən ictimai debatın manipulyasiya olunması cəhdləri yer alır. Prezident Emmanuel Makronun aprel ayında elan etdiyi və xarici müdaxilələrə qarşı mübarizə vasitələrini gücləndirməyi nəzərdə tutan qanun layihəsinin də yaxın vaxtlarda müzakirəyə çıxarılması gözlənilir.
Məlumata görə, “Viginum” tərəfindən yerli seçkilər zamanı müşahidə edilən xarici müdaxilələrlə bağlı hesabat yaxın günlərdə dərc olunacaq. Digər sənəddə isə “Əyilməz Fransa” (La France Insoumise LFI) partiyasına qarşı aparıldığı iddia edilən informasiya manipulyasiyaları əks olunacaq.
LFI may ayının sonunda bəzi rəhbərlərinə qarşı saxta ittihamların və saxta seçki materiallarının yayılmasını xarici müdaxilə təhlükəsi kimi qiymətləndirib. Bununla bağlı Paris Prokurorluğu tərəfindən araşdırma başlanıb.
Görüşdən sonra LFI-nin milli koordinatoru Manuel Bompard bildirib ki, Baş nazir bu məsələdə adı hallanan əməliyyatlarla bağlı İsrail rəsmilərindən izahat tələb etdiyini açıqlayıb. Partiya, həmçinin prezident seçkiləri kampaniyası dövründə xarici müdaxilələri izləyəcək xüsusi qurumun yaradılmasını və şəxsi məlumatların profilinə əsaslanan siyasi mesajların qadağan edilməsini təklif edib.
Fransa hökuməti isə ictimai mövqe bildirməklə müdaxilə arasında fərq olduğunu vurğulayır. Xarici işlər naziri Jan-Noel Barro bildirib ki, fikir ifadə etmək müdaxilə sayılmır, müdaxilə isə ictimai debatın və ya seçki proseslərinin manipulyasiyası deməkdir.
“Viginumun” məlumatlarına əsasən, 2024-cü ildə Fransada Avropa Parlamenti və parlament seçkiləri zamanı 25 xarici rəqəmsal müdaxilə cəhdi aşkarlanıb. Bununla belə, hakimiyyət orqanları bu cəhdlərin ictimai rəyə təsirinin məhdud olduğunu hesab edir.