BƏƏ 15 yaşından kiçik uşaqlara sosial şəbəkələrdən istifadəni qadağan edib
Birləşmiş Ərəb Əmirliklərində (BƏƏ) 15 yaşından kiçik uşaqlara sosial şəbəkələrdən istifadə qadağan edilib.
NUHÇIXAN xəbər verir ki, müvafiq qərar BƏƏ-nin vitse-prezidenti, Baş naziri və Dubay hakimi Şeyx Məhəmməd bin Rəşid Əl Məktumun sədrliyi ilə BƏƏ Nazirlər Kabineti tərəfindən qəbul edilib.
Yeni qaydalara əsasən, 15 yaşından kiçik uşaqlara sosial şəbəkələrdə şəxsi hesablar yaratmaq və onlardan istifadə etmək, eləcə də məzmun paylaşmaq, şərh yazmaq, açıq qruplarda iştirak etmək və geniş onlayn qarşılıqlı əlaqənin digər formaları da daxil olmaqla, platformaların əsas funksiyalarına çıxış əldə etmək qadağandır.
15-16 yaş arası yeniyetmələrə xüsusi mühafizə tədbirlərinə riayət olunmaqla sosial şəbəkələrdən istifadəyə icazə veriləcək. Onların sırasına məzmunun yaşa görə məhdudlaşdırılması, yad istifadəçilərlə əlaqə daxil olmaqla yüksək riskli funksiyaların söndürülməsi, platformalardan istifadə vaxtına nəzarət və valideyn nəzarəti alətlərinin mövcudluğu daxildir.
Qərar, həmçinin, platformaları rəqəmsal identifikasiya, süni intellekt texnologiyaları və biometrik alətlər də daxil olmaqla istifadəçilərin yaşını yoxlamaq üçün etibarlı mexanizmlər tətbiq etməyi nəzərdə tutur. Bununla belə, istifadəçi tərəfindən yaşın sadəcə qeyd edilməsi kifayət hesab olunmayacaq.
Bundan əlavə, sosial şəbəkələrə uşaqların internetdəki davranışlarının izlənilməsinə əsaslanan hədəfli reklamlar üçün onların məlumatlarından istifadə etmək qadağan edilir. Platformalar həmçinin yeni tələbləri pozaraq yaradılmış 15 yaşından kiçik uşaqların hesablarını aşkar etməli və bloklamalıdırlar.
Sosial şəbəkələrə fəaliyyətlərini yeni qaydalara uyğunlaşdırmaq üçün 12 aya qədər vaxt verilib.