Çində Əjdaha Qayıqları Bayramı günlərində dəmir yolu ilə 83 milyon sərnişinin daşınacağı gözlənilir

Proqnozlara görə, Əjdaha Qayıqları Bayramı ilə əlaqədar sərnişin daşımalarının ən intensiv dövrünü əhatə edən beş gün ərzində Çinin dəmir yolu şəbəkəsi təxminən 83 milyon sərnişinə xidmət göstərəcək.

NUHÇIXAN xəbər verir ki, bu barədə cümə axşamı Çinin “China State Railway” dövlət dəmir yolu şirkəti məlumat yayıb.

Şirkətin məlumatında deyilir ki, sərnişin axınının ən yüksək olduğu dövr cümə axşamından bazar ertəsinədək davam edəcək. “China Daily” nəşrinin yazdığına görə, şənbə günü təxminən 19 milyon sərnişinin dəmir yolu nəqliyyatından istifadə edəcəyi gözlənilir.

Cümə axşamı saat 08:00-a olan məlumata əsasən, Çinin dəmir yolu biletlərinin satış platformasında bayram günləri üçün 40 milyondan çox bilet satılıb. Sərnişin sayındakı kəskin artımın öhdəsindən gəlmək məqsədilə dəmir yolu operatoru pik dövr üçün xüsusi hərəkət cədvəli tətbiq edib. Həmin cədvələ əsasən, hər gün orta hesabla 13 minə yaxın sərnişin qatarı xəttə buraxılacaq.

Gecə saatlarında hərəkət edən yüksəksürətli qatarlar Pekin–Şanxay, Pekin–Quançjou və Pekin–Harbin kimi əsas yüksəksürətli dəmir yolu xətlərində fəaliyyət göstərəcək.

Çində Duanu Festivalı kimi də tanınan Əjdaha Qayıqları Bayramı bu il şənbə gününə təsadüf edir.