CNN: İran nüvə obyektlərini bərpa etməyə cəhd edir

İran öz nüvə obyektlərində infrastrukturun bərpası üzrə işlərə başlayıb.

NUHÇIXAN xəbər verir ki, bu barədə ABŞ-nin CNN telekanalı peyk görüntülərinə istinadən məlumat yayıb.

"Görünür ki, İran öz nüvə obyektlərini bərpa etməyə cəhd göstərir... İyunun sonu, iyulun əvvəlində ölkənin bir sıra nüvə və raket meydançalarında yeni aktivlik qeydə alınıb", - materialda bildirilir.

CNN-in iddialarına görə, redaksiyanın sərəncamında olan peyk şəkilləri Parçin hərbi kompleksi ərazisindəki aktivliyə işarə edir. Orada ABŞ və İsrail tərəfindən endirilən zərbələrdən sonra aparılan bərpa işlərinin izlərinin qeydə alındığı ehtimal olunur.

"21 iyun tarixli fotolar göstərir ki, Kolanq dağında (Natanzdakı nüvə kompleksinin yaxınlığında - red.) nəqliyyat vasitələri tunellərə daxil olur və oranı tərk edir. Həmin vaxt ABŞ ilə anlaşma memorandumu hələ qüvvədə idi", - CNN vurğulayır.

Daha əvvəl, may ayında "New York Times" nəşri ABŞ xüsusi xidmət orqanlarının məlumatlarına əsaslanaraq bildirib ki, İran bütün ölkə ərazisindəki yeraltı raket anbarları və buraxılış qurğularının təxminən 90%-nə girişi bərpa edib və hazırda onlar qismən və ya tam işlək olaraq qiymətləndirilir.

Xatırladaq ki, ABŞ Silahlı Qüvvələri 8-9 iyul tarixlərində İran ərazisinə zərbələr endirib. Mərkəzi Komandanlıqdan bildirilib ki, bu addımlar İran tərəfinin Hörmüz boğazından keçən ticarət gəmilərinə hücumlarına cavab olaraq atılıb. İran silahlı qüvvələri Küveyt, Bəhreyn və İordaniyada yerləşən ABŞ bazalarına cavab zərbələri endirib. Eyni zamanda, ABŞ Prezidenti Donald Tramp cümə axşamı atəşkəs rejiminin artıq qüvvədə olmadığını elan edib.