İspaniyanın keçmiş baş nazirinin Fransa millisi ilə bağlı açıqlamaları mübahisələrə səbəb olub
İspaniyanın keçmiş baş naziri Mariano Rahoy Fransa milli futbol komandası haqqında səsləndirdiyi fikirlərlə geniş müzakirələrə səbəb olub. O, İspaniyanın “El Debate” qəzetində dərc olunan məqaləsində Fransa millisinin heyətində “heç bir fransız oyunçunun olmadığını” iddia edib.
NUHÇIXAN xəbər verir ki, İspaniya ilə Fransa arasında keçiriləcək Dünya Çempionatının yarımfinal matçına toxunan Rahoy əvvəlcə Fransa millisinin uğurlarını yüksək qiymətləndirib. O, komandanın iki dəfə dünya çempionu olduğunu və son mundialın finalına yüksəldiyini xatırladıb. “Onların çox yüksək səviyyəli heyəti var. Düzdür, heyətdə heç bir fransız yoxdur. Amma çox yaxşı oynayırlar. Bu, son dərəcə təhlükəli rəqib olacaq”, – deyə İspaniyanın keçmiş baş naziri yazıb.
Mariano Rahoyun bu sözləri Fransada dərhal ciddi reaksiyalara səbəb olub. Bir sıra siyasətçilər onun açıqlamalarını müxtəlif mənşəli fransız futbolçuların milli kimliyini şübhə altına almaq cəhdi kimi qiymətləndiriblər.
Fransa Sosialist Partiyasının birinci katibi Olivye For X sosial şəbəkəsində paylaşım edərək bu fikirlərin Fransa Respublikasının milli anlayışına zidd olduğunu bildirib. “Fransa millisinin bütün üzvləri fransızdır. Fransa etnik dövlət deyil, onun nə dəri rəngi, nə də dini var. O, respublika dəyərləri ətrafında birləşmiş siyasi millətdir”, – deyə For yazıb və bu açıqlamaları “irqçi sağın ritorikası” kimi qiymətləndirib.
Fransanın ayrı-seçkiliklə mübarizə üzrə nümayəndə naziri Oror Berje də Rahoyun sözlərini pisləyərək, onları təkrar olunan irqçi iftiralar adlandırıb.
“Bu cür hallar artıq dayanmalıdır. İdman yenidən yalnız idman olmalıdır – insanların yalnız istedadına görə qiymətləndirildiyi bir sahə”, – deyə Berje X platformasında bildirib və Fransa millisinin ölkənin ən yaxşı dəyərlərini nümayiş etdirdiyini vurğulayıb.
71 yaşlı Mariano Rahoy 2011–2018-ci illərdə sağ-mühafizəkar Xalq Partiyasının (PP) rəhbərliyi altında İspaniya hökumətinə başçılıq edib. O, korrupsiya işi üzrə məhkum edilməsindən sonra qəbul edilən etimadsızlıq səsverməsi nəticəsində hakimiyyətdən gedib.
Rahoyun açıqlamaları İspaniya ilə Fransa arasında Dünya Çempionatının yarımfinal oyununa iki gün qalmış səslənib və Avropa milli komandalarında kimlik və müxtəliflik mövzusu ətrafında müzakirələri yenidən gündəmə gətirib.