Çində elektromobillərin orta yaşı cəmi 1,8 il təşkil edir

Çində elektromobillərin orta yaşı cəmi 1,8 il təşkil edir ki, bu da bir çox istehlakçıların mobil telefonlarını dəyişdirməsinin orta müddətindən azdır.

NUHÇIXAN xəbər verir ki, bu barədə Çin Avtomobil İstehsalçıları Assosiasiyasının "Hejun Consulting" şirkəti ilə birlikdə hazırladığı "Çində avtomobillərin satışından sonra xidmət bazarının inkişafı üzrə 2025-ci il üçün İllik Hesabat"ında deyilir.

Bununla yanaşı, ənənəvi daxili yanma mühərrikli (DYM) avtomobillərin orta yaşı 8,2 ilə çatıb, belə maşınların isə demək olar ki, 60%-i yeddi ildən çox istismar edilir.

Elektromobillərin tez-tez dəyişdirilməsi texnologiyaların sürətlə köhnəlməsi ilə izah olunur: "İki-üç il əvvəl buraxılmış maşınlar azalmış gediş ehtiyatı, aşağı şarj səmərəliliyi və məhdud hesablama gücü nümayiş etdirir".

"21st Century Business Herald" işgüzar nəşrinin hesabatına görə, Çində yeni avtomobillərin hazırlanması dövrü 18-24 aya qədər qısalıb ki, bu da ənənəvi benzin mühərrikli avtomobillər dövrü üçün xarakterik olan 60 aydan əhəmiyyətli dərəcədə azdır.