Fransa parlamenti evtanaziya qanununu təsdiq edib

Fransa Milli Assambleyası illərlə davam edən müzakirələrdən sonra evtanaziya ilə bağlı qanunu qəbul edib.

NUHÇIXAN BBC telekanalına istinadla xəbər verir ki, qanunun lehinə 291, əleyhinə isə 241 deputat səs verib və baxılması üçün Fransanın Konstitusiya Şurasına təqdim ediləcək. Sənəd orada təsdiqləndikdən sonra qüvvəyə minəcək.

Qanuna görə, daimi, dözülməz fiziki və ya psixoloji əzablarla müşayiət olunan ölümcül sağalmaz xəstəliklərdən əziyyət çəkən yetkin Fransa vətəndaşları evtanaziya üçün müraciət edə biləcəklər. Xəstənin müraciətindən sonra həkimlər 15 gün ərzində qərar qəbul etməlidirlər. Bundan sonra qərarın yekun təsdiqlənməsi üçün ikigünlük müddət verilir. Xəstə fiziki cəhətdən qabiliyyətlidirsə, ölümcül dərmanı özləri verirlər. Əks halda, prosedur həkim və ya tibb bacısı tərəfindən həyata keçirilir. Xəstənin yekun razılığı prosedur günü iştirak edən həkim tərəfindən təsdiqlənməlidir.

Qanun Fransada qızğın müzakirələrə səbəb olub. Prezident Emmanuel Makron onu dəstəkləsə də, katolik kilsəsi, tibb ictimaiyyətinin bəzi üzvləri və sağçı partiyaların nümayəndələri buna qarşı çıxır. Tənqidçilər yekun təsdiq üçün ikigünlük müddətin çox qısa olduğuna inanırlar.

Sorğulara görə, fransızların əksəriyyəti ölümcül xəstələrə palliativ qayğı və könüllü həyatdan getmək yardımı arasında seçim etmək hüququnun verilməsini dəstəkləyir.

Evtanaziya İspaniya, Niderland və Belçikada artıq qanuniləşdirilib. Almaniya və İtaliyada isə ölümə köməklik göstərilmə cinayət sayılmır, lakin hələlik bunu qanuni hesab edən ayrıca qanun yoxdur.