Rumıniya hava limanı ilin əvvəlindən 2 milyon sərnişinə xidmət göstərib

Rumıniyanın Kluj-Napoka şəhərində yerləşən Avram Yanku Beynəlxalq Hava Limanı ilin əvvəlindən etibarən 2 milyondan çox sərnişinə xidmət göstərib.

NUHÇIXAN Rumıniyanın Agerpres informasiya agentliyinə istinadla xəbər verir ki, bu göstərici ötən ilin eyni dövrü ilə müqayisədə artım deməkdir. Hava limanından bildirilib ki, əsas məqsəd 2045-ci ilədək aeroportun illik sərnişin tutumunu 10 milyona çatdırmaqdır.

Məlumata görə, 2025-ci ildə hava limanı rekord göstəriciyə nail olaraq 3 milyon 582 min sərnişin qəbul edib. Bu il isə sərnişin axınının artması fonunda 13 yeni aviareys istiqaməti əlavə olunub və bir sıra marşrutlar üzrə uçuşların sayı artırılıb.