Bolqarıstan “Rheinmetall” şirkəti ilə əməkdaşlığı genişləndirir
Bolqarıstan Almaniyanın aparıcı müdafiə sənayesi şirkətlərindən olan “Rheinmetall” ilə əməkdaşlığın genişləndirilməsi istiqamətində yeni mərhələyə başlayır.
NUHÇIXAN xəbər verir ki, bu barədə Bolqarıstanın Baş nazirinin müavini, iqtisadiyyat, investisiyalar və sənaye naziri Aleksandr Pulev məlumat verib.
Nazirin sözlərinə görə, Bolqarıstan hökuməti Almaniya ilə siyasi dialoqu gücləndirməklə yanaşı, “Rheinmetall” şirkəti ilə ekspert səviyyəsində danışıqlara start verir. Məqsəd müdafiə sənayesində əməkdaşlığın əhatə dairəsini genişləndirmək, müasir texnologiyaların transferini təmin etmək və Bolqarıstan müəssisələrinin Avropanın müdafiə təchizat zəncirində rolunu artırmaqdır.
A.Pulev bildirib ki, hökumət ölkə iqtisadiyyatının modernləşdirilməsini prioritet hesab edir və müdafiə sənayesini bu prosesin əsas istiqamətlərindən biri kimi qiymətləndirir. Onun fikrincə, texnologiya transferi yerli istehsalın rəqabət qabiliyyətini artıracaq və Bolqarıstan müəssisələrinin Avropa müdafiə sənayesinə inteqrasiyasını sürətləndirəcək.
Avropada təhlükəsizlik çağırışlarının artdığı bir dövrdə Bolqarıstan müdafiə sənayesini yenidən inkişaf etdirməyə çalışır. “Rheinmetall” isə son illərdə Avropada istehsal güclərini sürətlə genişləndirən şirkətlərdən biri hesab olunur və bir sıra ölkələrdə iri müdafiə layihələrini həyata keçirir.
Ekspertlərin fikrincə, Sofiya ilə “Rheinmetall” arasında əməkdaşlığın genişlənməsi Bolqarıstanın müdafiə sənayesinə yeni investisiyalar cəlb edə, yüksək texnologiyalı istehsalın inkişafını sürətləndirə və ölkənin NATO və Avropa İttifaqının müdafiə layihələrində iştirak imkanlarını artırmağa xidmət edə bilər.