BMqT: Hər il yüz minlərlə insan qanuni iş vəd edən cinayətkar şəbəkələrin hədəfinə çevrilir
Qlobal miqyasda iş elanlarının arxasında cinayətkar şəbəkə gizlənə bilər. Hər il yüz minlərlə insan xaricdə qanuni iş vədi ilə insan alverinə məruz qalır, sonra isə girov götürülür və onlayn fırıldaq əməliyyatlarına məcbur edilir.
NUHÇIXAN xəbər verir ki, BMT-nin Beynəlxalq Miqrasiya Təşkilatı (BMqT) potensial əmək miqrantlarını məcburi kibercinayətkarlara çevirən və sürətlə genişlənən milyardlarla dollarlıq cinayətkarlıq sənayesi ilə bağlı hesabat dərc edib.
Təşkilatın baş direktoru Emi Pop Cenevrədə jurnalistlərə bildirib: “Dünyanın 80-dən çox ölkəsindən olan qurbanların xüsusilə Asiyada fəaliyyət göstərən fırıldaqçılıq mərkəzlərinə aparıldığını görürük”. O, işəgötürənlərin sosial mediada ingilis dilində yaxşı danışan və çox vaxt ixtisas dərəcələri olan insanları hədəf aldığını qeyd edib. Cinayətkarların tələsinə düşən qurbanlar girov saxlanılır, onların pasportları və telefonları əllərindən alınır, daim nəzarət altında qalırlar. Bir çoxları döyülür və ya təhdid edilir, zorakılıq və borc asılılığı yolu ilə dünya miqyasında insanları hədəf alan fırıldaqçılıq əməliyyatları aparmağa məcbur edilirlər.
Baş direktor əlavə edib: “Qurbanlar tez-tez fiziki və ya zehni istismara məruz qalırlar. Çox vaxt bu cinayətkar şəbəkələrdən qurtula bilmirlər. Xilasetmə yalnız bərpa prosesinin başlanğıcıdır: sağ qalanlar travma, damğa, borc, itkin sənədlər və təqib qorxusu ilə evə qayıdırlar”.
Təşkilat bildirib ki, insan alveri ilə bağlı cinayətkarlığın miqyası heyrətamizdir. BMT-nin Narkotiklər və Cinayətkarlıq üzrə Ofisinin yeni məlumatları Şərqi və Cənub-Şərqi Asiya, Avstraliya və Yeni Zelandiyada 2025-ci ildə fırıldaqçılıq cinayətlərindən yaranan itkilərin 88,3 milyard dollarla 114,1 milyard dollar arasında olduğunu göstərir ki, bu da insan alveri ilə mübarizəyə ayrılan resurslardan daha azdır. E. Pop xəbərdarlıq edib: “Məsələyə kifayət qədər ciddi yanaşmasaq, cinayətkar şəbəkələr daha da fəallaşacaq”.
BMqT qurbanların qorunmasına, onların təhlükəsiz qayıdışına və reinteqrasiyasına, həmçinin insan alverçilərinin taktikaları barədə ictimaiyyəti daha geniş məlumatlandırmağa çağırır.
BMqT son hesabatını iyulun 30-da qeyd olunan Ümumdünya İnsan Alverinə Qarşı Mübarizə Günündən əvvəl açıqlayıb.