Fransa strateji sektorlara xarici investisiyalar üzərində dövlət nəzarətini gücləndirir

Fransa hökuməti milli təhlükəsizlik baxımından həssas hesab olunan sektorlarda fəaliyyət göstərən şirkətlərin xarici investorlar tərəfindən alınmasına nəzarəti sərtləşdirən yeni fərman qəbul edib.

NUHÇIXAN xəbər verir ki, Baş nazir aparatı (Matignon) tərəfindən elan edilən qərara əsasən, dövlətin müdaxilə həddi əhəmiyyətli dərəcədə aşağı salınıb.

İndiyədək xarici investor Fransa şirkətinin səhmlərinin 25 faizini və ya daha çoxunu əldə etdikdə, əməliyyata İqtisadiyyat Nazirliyi nəzarət edirdi. Yeni qaydalara əsasən isə bu hədd 10 faizə endirilib.

Baş nazir aparatının açıqlamasında bildirilir ki, qərar artan geosiyasi gərginlik fonunda Avropa İttifaqından kənar investorların Fransanın strateji əhəmiyyət daşıyan şirkətlərində fürsətçi pay əldə etməsinin və bunun milli təhlükəsizlik üçün risk yaratmasının qarşısını almaq məqsədi daşıyır.

Hökumət eyni zamanda vurğulayıb ki, yeni nəzarət mexanizmi şirkətlərin maliyyə bazarlarından vəsait cəlb etmək imkanlarını məhdudlaşdırmamaq üçün sürətləndirilmiş prosedur əsasında həyata keçiriləcək.

Yeni qaydalara görə, xarici investor planlaşdırdığı əməliyyat barədə İqtisadiyyat, Maliyyə və Sənaye, Enerji və Rəqəmsal Suverenlik Nazirliyinin Baş Xəzinədarlıq İdarəsinə əvvəlcədən məlumat verməlidir. Sənədlər tam təqdim edildikdən sonra iqtisadiyyat naziri 10 gün ərzində əməliyyatın əlavə və daha ətraflı araşdırmaya ehtiyac olub-olmadığı barədə qərar qəbul edəcək.