Ankarada Türkiyə və Suriyanın xarici işlər nazirləri görüşəcək
Türkiyə terrorizmlə mübarizə sahəsində Suriya ilə koordinasiyanı daha da inkişaf etdirmək əzmindədir.
NUHÇIXAN xəbər verir ki, bu barədə Türkiyənin Xarici İşlər Nazirliyindən bildirilib.
Məlumatda qeyd olunub ki, avqustun 6-da Türkiyəyə işgüzar səfər edəcək Suriyanın xarici işlər naziri Əsəd Həsən Şeybaninin türk həmkarı Hakan Fidanla görüşü olacaq. Görüşdə Suriyada davamlı sabitlik və təhlükəsizliyin təmin olunması istiqamətində Türkiyənin də dəstəyi ilə həyata keçirilən çoxtərəfli səylərin qiymətləndirilməsi nəzərdə tutulur. Həmçinin, qarşıdakı dövrdə həyata keçiriləcək yüksəksəviyyəli qarşılıqlı səfərlərin planlaşdırılması da nəzərdən keçiriləcək.
Bununla yanaşı, Türkiyə üçün xüsusi əhəmiyyət kəsb edən Suriyanın şimal-şərq bölgələrinin mərkəzi hökumətə inteqrasiyası prosesi də müzakirə olunacaq.