Çinin robot istehsalçısı 904 milyon dollar vəsait cəlb edəcək
Humanoid və dördayaqlı robotların hazırlanmasında ixtisaslaşmış Çinin “Unitree Technology” şirkəti Şanxay Fond Birjasında ilkin kütləvi təklifini (IPO) səhm başına 150,8 yuan (22,34 dollar) olaraq qiymətləndirib. Şirkət təxminən 6,1 milyard yuan (903,9 milyon dollar) toplamağı və Çinin materik hissəsində ilk açıq ticarət edilən humanoid robot istehsalçısı olmağı planlaşdırır.
NUHÇIXAN “Reuters” agentliyinə istinadla xəbər verir ki, “Citic Securities” investisiya bankı Lançjouda yerləşən “Unitree” şirkətinin IPO-dan sonra bazar kapitallaşmasının 50 milyard yuanı (7,4 milyard dollar) keçə biləcəyini təxmin edir.
“Citic Securities” şirkətin avqustun sonlarında gözlənilən listinqdən sonrakı 6-12 ay ərzində bazar dəyərinin 50,6 milyard ilə 55,9 milyard yuan arasında olacağını proqnozlaşdırır. Sənəd IPO-nun qiymət prosesi ərəfəsində hazırlanıb.
IPO zamanı toplanan vəsaitin innovativ inkişaf, istehsal gücünün genişləndirilməsi və robototexnika texnologiyalarının daha da təkmilləşdirilməsi üçün istifadə edilməsi planlaşdırılır.
“Unitree” Çinin ən böyük humanoid robot istehsalçılarından biridir. O, “Tesla” və “Boston Dynamics” kimi şirkətlərlə qlobal miqyasda rəqabət aparır. Humanoid modellərə əlavə olaraq, şirkət sənayedə, tədqiqatda və digər sahələrdə istifadə olunan dördayaqlı robotlar istehsal edir.
“Citic Securities”in hesabatında qeyd olunur ki, “Unitree” yüksək performansa malik ümumi təyinatlı robototexnika sahəsində aparıcı mövqe tutur, tədqiqat və inkişafda ehtiyatlı investisiya strategiyası həyata keçirir, inteqrasiya olunmuş süni intellekt texnologiyası ekosistemindəki mövqeyini gücləndirir.
Pekin yüksək texnologiya sektorunda ABŞ ilə artan rəqabət fonunda robototexnika sahəsinin inkişafını texnologiya siyasətinin əsas istiqaməti hesab edir.
“Unitree” IPO-su, həmçinin ABŞ məhdudiyyətlərinin sərtləşdirilməsi fonunda baş verir: Vaşinqton əvvəllər xaricdə istehsal olunan qabaqcıl robotları əhatəli siyahıya daxil edirdi və bu da onların Amerika bazarında satışı üçün tələb olunan təsdiq prosesini çətinləşdirirdi.