Gələn il qlobal neft tələbatının gündəlik 105,7 milyon barel olacağı gözlənilir

Beynəlxalq Enerji Agentliyi (IEA) cari il üçün qlobal neft tələbatı proqnozunu ötənaykı proqnozla müqayisədə gündəlik 510 min barel azaldıb.

NUHÇIXAN xəbər verir ki, bu barədə agentliyin neft bazarına dair aylıq hesabatında deyilir.

IEA-ya görə, bu, Hörmüz boğazının bağlanmasının davam etməsi və istehlakı azaldan yüksək yanacaq qiymətləri səbəbindən beynəlxalq neft təchizat zəncirlərindəki fasilələr səbəbindən baş verib. Müvafiq olaraq, qlobal neft tələbatının ötən illə müqayisədə cari ildə gündəlik 1,6 milyon barel azalacağı gözlənilir.

Hesabatda bildirilir ki, yüksək yanacaq qiymətləri neft istehlakının sürətli bərpasına mane olur, çatdırılma məlumatları isə tələbatın ən kəskin azalmasının geridə qaldığını göstərir. Normallaşmanın davam edəcəyini nəzərə alsaq, qlobal neft tələbatının noyabr ayından etibarən yenidən artmağa başlayacağı proqnozlaşdırılır. Rüblük olaraq, tələbatın ötən ilin eyni dövrləri ilə müqayisədə ikinci rübdə gündəlik 4,9 milyon barel, üçüncü rübdə isə 2,8 milyon barel azalacağı gözlənilir. Tələbatın birinci rübdə 860 min barel, son rübdə isə 580 min barel artacağı təxmin edilir.

IEA 2027-ci il üzrə gündəlik təxminən 2 milyon barel artım proqnozunu saxlayaraq qlobal neft tələbatının sutkada 105 milyon 700 min barelə çatacağını proqnozlaşdırır.