“Rheinmetall” Almaniya ordusu üçün əlavə 149 mobil tibbi yardım məntəqəsi hazırlayacaq

Almaniyanın “Rheinmetall” müdafiə sənayesi konserni bu ölkənin Silahlı Qüvvələri (Bundesver) üçün əlavə 149 mobil tibbi yardım məntəqəsi hazırlayacaq.

NUHÇIXAN xəbər verir ki, şirkətin məlumatında sifarişin ümumi dəyərinin 500 milyon avrodan çox olduğu, prosesin 2027-ci ilin birinci rübündə başlanmasının planlaşdırıldığı bildirilib.

İyulda rəsmiləşdirilən yeni sifarişlə Bundesverə çatdırılacaq belə sistemlərin ümumi sayı 165-ə, müqavilənin ümumi dəyəri isə 600 milyon avroya çatır.

Mobil tibbi məntəqələr hərbi qulluqçulara ilkin təcili tibbi yardım göstərmək üçün nəzərdə tutulub. Hər bir sistem iki konteynerdən ibarətdir və müstəqil fəaliyyət göstərə bilir. Sistem qısa müddətdə dörd hərbçi tərəfindən quraşdırılıb sökülə bilər. Məntəqələrdə təcili yardım və əlavə müalicə bölmələri yerləşdirilir, tibbi avadanlıq istifadə tələblərinə uyğun qurula bilir. Yeni sistemlər müxtəlif hərbi nəqliyyat vasitələri ilə daşına və çətin relyefdə quraşdırıla bilir.