BMT rəsmisi Yəməndə mülki əhali arasında qurbanların sayının artmasından narahatdır
BMT-nin İnsan Hüquqları üzrə Ali Komissarı Volker Türk Yəməndə döyüşlərin intensivləşməsi fonunda mülki əhali arasında qurbanların sayının artmasından narahatlığını ifadə edib.
NUHÇIXAN xəbər verir ki, Ali Komissarlığın məlumatına görə, avqustun 6-dan etibarən hökumətin nəzarətində olan ərazilərdə “Ənsar Allah” qruplaşmasının hücumları nəticəsində azı 17 mülki şəxs həlak olub və yaralanıb. Bundan əlavə, iyulun sonunda bu hərəkatın nəzarətində olan ərazilərdə daha iki ölümcül insident qeydə alınıb.
Ali Komissar bütün tərəfləri gərginliyi azaltmağa və Yəmən xalqını gələcəkdə qarşılaşa biləcəyi əziyyətlərdən xilas etməyə çağırıb. O, ölkəni yenidən genişmiqyaslı müharibəyə sürükləyə biləcək istənilən fəaliyyətə dərhal son qoyulmasının vacibliyini vurğulayıb.
Qeyd olunub ki, son insidentlər arasında avqustun 7-də “Ənsar Allah” tərəfindən atılan raketin Mərib şəhərində məcburi köçkünlər üçün düşərgəyə düşməsi də var. Hadisə nəticəsində altı nəfər yaralanıb və onlardan biri uşaq olub. Avqustun 9-da Əl-Muha şəhərinə raket və PUA hücumları nəticəsində üç nəfər liman işçisi həlak olub, dörd nəfər yaralanıb. Ali Komissarlıq avqustun 14-15-də limana endirilən məlumatları da araşdırır.
Avqustun 11-də “Ənsar Allah” hərəkatı Babül-Məndəb boğazında yük gəmisinə zərbə endirib. Nəticədə ekipajın dörd üzvü – üç nəfər Pakistan vətəndaşı və bir nəfər İndoneziya vətəndaşı həlak olub, bir neçə nəfər isə yaralanıb.
Volker Türk qeyd edib ki, mülki infrastruktura edilən hücumlar əhalinin vəziyyətini daha da ağırlaşdırır. Hazırda azı 18 milyon yəmənli ərzaq çatışmazlığından əziyyət çəkir. Bütün tərəflər beynəlxalq humanitar hüquq normalarına əməl etməli, mülki şəxslərə və mülki obyektlərə hücum etməkdən çəkinməli, əhali arasında itkilərin qarşısını almaq üçün bütün mümkün tədbirləri görməlidirlər.