Media: “El-Nino” ölkələrə trilyonlarla dollar ziyan vura bilər

Dünyanın iqlim şəraitinə təsir edən “El-Nino” hadisəsi trilyonlarla dollar itkiyə səbəb ola və ən çox tropik ölkələrə zərər verə bilər.

NUHÇIXAN xəbər verir ki, bu barədə “The Wall Street Journal” məlumat yayıb.

Bildirilib ki, okeanlarda suyun temperaturu rekord səviyyəyə çatıb ki, bu da qlobal istiləşməni daha da artırıb.

İndiana Universitetinin alimi Kristofer Kallahan bildirib ki, “El-Nino”nun iqtisadi nəticələrinin olduqca ağır olması mümkündür. Onun apardığı tədqiqaa görə, “El-Nino”, xüsusilə tropik iqtisadiyyatlar üçün böyük itkilərə səbəb olacaq.

“The Wall Street Journal”da yazılıb ki, “El-Nino” logistikaya da təsir göstərir. Quraqlıq səbəbindən Qatun gölündə suyun səviyyəsi aşağı enib, bu da Panama kanalının operatorunu oradan keçən gəmilərin sayını azaltmağa vadar edib.

Miçiqan Universiteti də “El-Nino” tendensiyasının intensivliyinin son 40 ildə 40 faiz artdığını və cari minillik üçün pik həddə çatdığını açıqlayıb.

Qeyd edək ki, Yer kürəsinin iqlimi və havası əsasən iki hadisənin – “El-Nino”nun və “La-Nina”nın vəziyyətindən asılıdır. Birincisi, mərkəzi və şərqi Sakit Okeanda səth sularının kəskin istiləşməsi, ikincisi isə bu bölgələrin soyuması ilə əlaqələndirilir. “La-Nina” və “El-Nino” bir neçə ildən bir növbələşir ki, bu da okean axınlarında və atmosfer küləklərinin modellərində əhəmiyyətli dəyişikliklərə səbəb olur. Bu dəyişikliklər vaxtaşırı Yer kürəsinin bəzi bölgələrində quraqlığa, digərlərində isə güclü yağıntılara səbəb olur.