Qlobal miqyasda kritik minerallara investisiyalar 9 faiz azalıb

Qlobal miqyasda kritik minerallara investisiyalar ötən il əvvəlki ilə nisbətən 9 faiz azalıb.

NUHÇIXAN xəbər verir ki, bu barədə Beynəlxalq Enerji Agentliyinin (IEA) məlumatında deyilir.

Bildirilir ki, təmiz enerji texnologiyalarında istifadə olunan kritik minerallara qlobal tələbat 2024-cü ildəki 12,3 milyon tondan 2050-ci ildə təxminən 43 milyon tonadək artacaq. Gələcək proqnozlar göstərir ki, bu proseslər mədənçilikdən daha çox emal mərhələsində baş verəcək.

Hazırda dünyanın litium emal gücünün 85 faizi və batareya dərəcəli qrafit emal gücünün isə 91 faizi üç ölkəyə məxsusdur. Nadir torpaq elementləri istisna olmaqla, hər bir mineralda ən böyük emal ölkəsinin orta payı 2023-cü ildəki 70 faizdən 2025-ci ildə 72 faizə yüksəlib.

Ekspertlərin fikrincə, enerji keçidi qalıq yanacaq idxalından asılılığı azaltsa da, təmiz enerji texnologiyalarının istehsalı, kritik mineralların emalı və təchizat zəncirlərində konsentrasiya yeni enerji təhlükəsizliyi riskləri yaradır.