Kolumbiyada Fransa Xarici Legionunun kapralı oğurlanıb
Keçmiş Kolumbiya İnqilabi Silahlı Qüvvələrinin (ex-FARC) dissident qruplarından olan “Estado Mayor Central” (EMC) avqustun 6-dan itkin düşən Fransa Xarici Legionunun kolumbiyalı kapralı Xose Olger Melo Çarrini oğurladığını açıqlayıb.
NUHÇIXAN xəbər verir ki, EMC-nin bildirdiyinə görə, hərbçi Narino departamentinin Kumbitara ərazisində saxlanılıb və sağlam vəziyyətdədir. Qrup onu “müharibə əsiri” adlandırıb və mümkün hərbi əməliyyatın onun həyatını təhlükəyə ata biləcəyi barədə xəbərdarlıq edib.
Melo Çarri dörd ilə yaxındır Fransa ordusunun Xarici Legionunda xidmət edir. O, Kolumbiyada məzuniyyətdə olarkən yoxa çıxıb. Fransa Müdafiə Nazirliyi hadisəni yaxından izlədiyini, Kolumbiya hakimiyyəti isə araşdırma başlatdığını bildirib.
İlkin məlumata görə, hərbçi ilə birlikdə olan qadın da silahlı şəxslər tərəfindən aparılıb, lakin bir neçə saat sonra azad edilib.