Cənubi Koreya, ABŞ və Yaponiya birgə hərbi təlimlərə başlayıblar
Cənubi Koreya, ABŞ və Yaponiya “Freedom Edge” adlı üçtərəfli hərbi-dəniz təlimlərinə başlayıblar.
NUHÇIXAN xəbər verir ki, “Yonhap” agentliyi Cənubi Koreya Silahlı Qüvvələrinin Birləşmiş Qərargah Rəislərinə istinadla məlumat yayıb.
Təlimlər Çeju adasının cənub və şərqində yerləşən beynəlxalq sularda keçirilir və beş gün davam edəcək. Manevrlər dəniz, hava və kiberməkan da daxil olmaqla müxtəlif sahələri əhatə edir.
Cənubi Koreya tərəfi təlimlərin müdafiə xarakteri daşıdığını və beynəlxalq hüquqa uyğun keçirildiyini bildirib. Seul həmçinin təlimlərə cəlb olunan qüvvələrin miqyasının ötənilki təlimlərlə müqayisə edilə biləcəyini qeyd edib.
“Freedom Edge” təlimlərinin ilk mərhələsi 2024-cü ilin iyununda, növbəti mərhələləri isə 2024-cü ilin noyabrında və 2025-ci ilin sentyabrında keçirilib.