Aİ Ukraynanın “Patriot” sistemləri üçün zəruri məhsullar almasına imkan yaradıb
Avropa İttifaqına (Aİ) üzv dövlətlər Ukraynaya “Patriot” hava hücumundan müdafiə sistemləri üçün zəruri məhsulların alınmasına imkan verən istisnanı təsdiqləyib.
NUHÇIXAN xəbər verir ki, Avropa Komissiyasının Prezidenti Ursula Fon der Lyayen bu barədə bəyanatında NATO-nun Baş katibi Mark Rutte ilə birlikdə bu razılaşmanı müsbət qarşıladıqlarını vurğulayıb.
Onun sözlərinə görə, Ukraynaya ayrılacaq növbəti 3,2 milyard avro ölkəyə öz səmasını Rusiyanın hücumlarından daha yaxşı qorumağa imkan verəcək.
Aİ-nin Ukrayna Dəstək Krediti çərçivəsində bundan əvvəl artıq 8,4 milyard avro vəsait ödənilib və həmin məbləğin bir hissəsi hava hücumundan müdafiə imkanlarının gücləndirilməsinə yönəldilib. Ümumilikdə 2026-2027-ci illər üçün nəzərdə tutulan kredit mexanizminin həcmi 90 milyard avrodur.
Avropa Komissiyasının rəhbəri Aİ-nin Ukraynaya dəstəyi davam etdirəcəyini vurğulayıb: “Ukraynanı dəstəkləmək və Avropanın müdafiə imkanlarını gücləndirmək üçün əl-ələ verərək çalışmaqda davam edəcəyik”.
Qeyd edək ki, bu qərar Ukraynanın Rusiya tərəfindən həyata keçirilən intensiv raket və dron hücumları fonunda hava hücumundan müdafiə sistemlərinə ehtiyacının artdığı bir vaxtda qəbul edilib.