Rumıniya enerji saxlama sistemlərinə 650 milyon avrodan çox vəsait ayırır
Rumıniya elektrik enerjisinin saxlanması imkanlarının genişləndirilməsi üçün 650 milyon avrodan çox vəsait ayırıb.
NUHÇIXAN xəbər verir ki, Rumıniyanın Baş naziri İlie Bolojan ölkədə elektrik enerjisinin yüksək qiymətlərinin əsas səbəblərindən birinin istehsal və istehlak arasındakı gündəlik balanssızlıq olduğunu bildirib.
Baş nazirin sözlərinə görə, xüsusilə yay aylarında günorta saatlarında Rumıniyada artıq elektrik enerjisi istehsal edilir. Axşam saatlarında isə istehlakın yüksəlməsi fonunda sistemdə çatışmazlıq yaranır və ölkə elektrik enerjisini daha yüksək qiymətlərlə idxal etmək məcburiyyətində qalır.
İlie Bolojan bildirib ki, son illərdə qaz elektrik stansiyalarına və enerji saxlama güclərinə kifayət qədər investisiya qoyulmaması hazırkı problemlərin əsas səbəblərindəndir. Onun sözlərinə görə, kömürlə işləyən stansiyaları əvəz etməli olan bir sıra qaz layihələrinin həyata keçirilməsi gecikib. Hökumət enerji saxlama layihələri üzrə son maliyyələşdirmə tranşında 650 milyon avrodan çox vəsait ayırıb. Yaxın günlərdə həm dövlət qurumları, həm də özəl şirkətlər üçün layihə çağırışının açılması planlaşdırılır.
Məqsəd günorta saatlarında yaranan artıq elektrik enerjisini batareya və digər saxlama sistemlərində toplamaq və tələbatın, eləcə də qiymətlərin daha yüksək olduğu axşam saatlarında şəbəkəyə qaytarmaqdır. Hökumət bu mexanizmin həm idxaldan asılılığın, həm də topdansatış bazarında qiymət dəyişkənliyinin azalmasına kömək edəcəyini gözləyir.
Baş nazir, həmçinin elektrik şəbəkələri, transformator stansiyaları, istehlakçı-istehsalçılar üçün batareyalar və “ağıllı sayğac” sistemləri üzrə prioritet investisiyaları müəyyənləşdirəcək enerji paktının hazırlanmasını təklif edib. Bolojanın sözlərinə görə, görülən tədbirlərin nəticəsi dərhal görünməyəcək, çünki energetika sahəsində iri investisiyaların təsiri adətən bir neçə ildən sonra hiss olunur. Bununla belə, o, yeni istehsal və saxlama güclərinin istifadəyə verilməsi hesabına gələn ildən enerji bazarında qiymətlərin aşağı düşəcəyini gözlədiyini bildirib.
Rumıniya hökuməti oktyabr ayında Çernavoda Atom Elektrik Stansiyasının enerji blokunun yenidən işə salınmasının da milli enerji sistemində balansın yaxşılaşdırılmasına töhfə verəcəyini hesab edir.