Rumıniya Avropa İttifaqını Qara dəniz üzrə yeni dayanıqlılıq platformasını dəstəkləməyə çağırıb
Rumıniya Avropa Komissiyasını Qara dəniz regionunda böhranlara və yeni təhlükələrə qarşı hazırlığın gücləndirilməsinə yönəlmiş Qara dəniz Dayanıqlılıq Platformasının həyata keçirilməsini dəstəkləməyə çağırıb.
NUHÇIXAN xəbər verir ki, bu məsələ Rumıniyanın Baş naziri İlie Bolojanın Buxarestdə Avropa Komissiyasının bərabərlik, hazırlıq və böhranların idarəolunması üzrə komissarı Hadja Lahbiblə görüşündə müzakirə edilib.
Tərəflər Rumıniya və bütövlükdə Avropa İttifaqının fövqəladə vəziyyətlərə cavab imkanlarının gücləndirilməsi, həmçinin Qara dəniz regionundakı təhlükəsizlik vəziyyəti ətrafında fikir mübadiləsi aparıblar.
İlie Bolojan Qara dəniz regionuna daha çox diqqət ayrılmasının zəruriliyini vurğulayıb. O, Rumıniyanın Avropa İttifaqının Qara dənizə dair yeni strateji yanaşması çərçivəsində təklif etdiyi Dayanıqlılıq Platformasının həyata keçirilməsi üçün Avropa Komissiyasının dəstəyini istəyib.
Təşəbbüs regional əməkdaşlığın gücləndirilməsini, böhran vəziyyətlərinə hazırlıq və cavab imkanlarının inkişaf etdirilməsini, həmçinin yeni növ risklərə qarşı dövlətlər arasında koordinasiyanın artırılmasını nəzərdə tutur. Görüşdə Qara dənizdə və NATO-nun şərq cinahına yaxın ərazilərdə PUA insidentləri də təhlükəsizlik riskləri sırasında xüsusi qeyd olunub.
Avropa komissarı Hadja Lahbib risklərə qabaqlayıcı yanaşmanın əhəmiyyətini vurğulayıb və Avropa səviyyəsində yeni risk qiymətləndirməsinin noyabr ayında açıqlanacağını bildirib. O, üzv dövlətlər arasında böhran zamanı kommunikasiya və koordinasiyanın təkmilləşdirilməsinin, eləcə də Avropa Komissiyasının Fövqəladə Hallara Cavabın Əlaqələndirilməsi Mərkəzinin rolunun gücləndirilməsinin vacibliyini qeyd edib.
Avropa komissarı Rumıniyanın mülki və hərbi strukturlar arasında əməkdaşlıq modelini də müsbət qiymətləndirib. Rumıniya son dövrdə Avropa Mülki Müdafiə Mexanizmi çərçivəsində Fransa, Yunanıstan və Serbiyada meşə yanğınlarının söndürülməsinə qüvvə və texnika göndərib, digər beynəlxalq fövqəladə əməliyyatlarda da iştirak edib.
Qara dəniz Dayanıqlılıq Platformasının yaradılması regionda təhlükəsizliklə yanaşı kritik infrastrukturun, nəqliyyat və enerji marşrutlarının davamlılığı baxımından da əhəmiyyət daşıya bilər.