Benzin və dizelin bahalaşması Böyük Britaniyada inflyasiyanı yüksəldib
Böyük Britaniyada benzin, dizel və aviabiletlərin qiymətlərinin artması avqust ayında inflyasiyanın son 5 ayın ən yüksək səviyyəsinə çatmasına səbəb olub.
NUHÇIXAN BBC-yə istinadla xəbər verir ki, Böyük Britaniyanın Milli Statistika İdarəsi (ONS) illik inflyasiyanın iyulda qeydə alınan 2,9 faizdən avqustda 3,1 faizə yüksəldiyini bildirib. Avqust ayında Yaxın Şərqdə davam edən münaqişənin qlobal neft tədarükünə təsiri fonunda avtomobil yanacağının qiymətləri kəskin artıb. ONS bildirir ki, benzinin qiyməti təxminən son 4 ilin ən yüksək səviyyəsinə çatıb, dizel yanacağı da əhəmiyyətli dərəcədə bahalaşıb.
Ötən ilin avqustu ilə müqayisədə avtomobil yanacağının qiymətləri ümumilikdə 23 faiz artıb. İyuldan avqusta qədər Böyük Britaniyada benzinin orta qiyməti litr üçün 9,1 pens yüksələrək 161,3 pensə çatıb. ONS bunun 2022-ci ilin noyabrından bəri qeydə alınan ən yüksək göstərici olduğunu bildirib. Həmin dövrdə Rusiyanın Ukraynaya genişmiqyaslı müdaxiləsi qlobal enerji qiymətlərinin kəskin artmasına səbəb olmuşdu.
İnflyasiyanın yüksəlməsinə yay tətili mövsümünün pik dövründə aviabiletlərin bahalaşması da təsir göstərib.