Omanda ABŞ nümayəndələri ilə husilərin məxfi görüşü keçirilib
ABŞ nümayəndələri Yəmənin husilər hərəkatının nümayəndələri ilə Omanda görüş keçiriblər.
NUHÇIXAN "Reuters"ə istinadən xəbər verir ki, görüş ötən həftəsonu ABŞ-nin Maskatdakı səfirliyində baş tutub. Görüşün təşkilinə Oman hökuməti kömək edib.
Görüş zamanı husilər ABŞ tərəfinə onların gəmilərinə hücum etmək niyyətində olmadıqlarını və 2025-ci ildə Vaşinqtonla əldə edilmiş atəşkəsə sadiq qaldıqlarını bildiriblər. Onlar həmçinin Səudiyyə Ərəbistanına məxsus gəmilər istisna olmaqla, İsrail gəmilərinə və ya ticarət gəmilərinə hücum etmək niyyətlərinin olmadığını da qeyd ediblər.
Amerika tərəfini ABŞ səfirliyinin əməkdaşları təmsil edib. İddialara görə, husilərin nümayəndə heyətinə hərəkatın yüksək rütbəli nümayəndələri Məhəmməd Əbdüssəlam və Əbdülmalik əl-Əciri daxil olublar.
Ötən həftə husilər tarixi Moha limanı və Bab əl-Məndəb boğazındakı Perim adası da daxil olmaqla, Yəmənin Qırmızı dənizdəki bütün sahilləri üzərində faktiki nəzarət qurdular.
2025-ci ilin martında Tramp administrasiyası husiləri xarici terror təşkilatları siyahısına daxil edib. Bununla belə, Vaşinqton qruplaşma ilə danışıqları davam etdirib və ABŞ-nin Qırmızı dənizdə gəmiçiliyə hücumların qarşısını almağa yönəlmiş husilərə qarşı iki aylıq hərbi əməliyyatından sonra, 2025-ci ilin mayında onunla atəşkəs razılaşması əldə edib.